Vawiin August ni 7, 2023 (Thawhtanni) hian Mizo Hnam Run chhung inkhawm neih a ni a. Dr.L.Thangmawia MLA, Human Resources Development Board, Vice Chairman leh MNF Thalai President ni bawk chuan thu a sawi.
Dr.L.Thangmawia chuan, kum 2018 MLA inthlanpuia kohhhran hoten kan Pathian hnena kan tawngtai chhanna atan, Zoram mipuiten hneh taka MNF sawrkarna min pek hnuah inthlanna tam tak a awm leh tawh a. Chung inthlanna hrang hrang MP, Aizawl Municipal Corporation(AMC), Local Council(LC), Village Council(VC), Lai Autonomous District Council(LADC), Chakma Autonomous District Council(CADC), Sinlung Hills Council(SHC), te bakah Aizawl West-I leh Tuirial bial MLA Bye Election-ah te Pathian leh mipuite zarah MNF in hnehna changin, tun term kal mek chhunga inthlanna awm zawng zawng atanga 80%(za a sawmriat) chuangah Zoram mipuiten MNF sawrkar an rintawk zia an vote hmangin an ti lang tawh a, Zoram mipuite chungah pawh lawmthu kan sawi mawlh mawlh a ni. Hei hi chapo pui tur lam ni lovin, ram leh hnam tana nasa zawka thawk tura MNF ten ke kan pen atul zia tilang tu zawk a ni.
Mizoram State anih hnua MLA term khat chhunga hun harsa leh khirh tam ber tum kan hmachhawn mek a. Hripui tihbaiawm hun thim rapthlak tak chu Pathian hruaina leh Zoram mipuite nena kan thawhhona avangin kan paltlang a, ramri buaina nasa ber kan tawk a, lirnghing leh vawk pul hri nen, kan ram thenawm a kan unauten harsatna an tawh avanga kan tuamhlawm ngaiin an rawn awm in dawt chho zut bawk a, kan tih theih tlem hle mahse sawrkar leh Mizo mipuiten kan tih theih tawk kan ti zel tih chu anmahni kan unaute ngei pawhin an hmuh dan a nih ka ring. Sum leh pai harsatna kan tawh mek laiin insenso belhna tur lam sawrkar leh mipuiten kan neih belh ta zel zawk a nih hi. Kan ram leh hnam tana thawh hi hun harsa karah pawh MNF te hian kan ning mai tur a ni lo va, sawiselna tam tak karah “Kan theih tawp kan ram leh hnam tan kan chhuah em?” tih hi kan in en let fo na tur a ni zawk ang, a ti a.
Human Resource Development Board Vice Chairman chuan, tun MLA term, hun harsa tak karah chawl lovin hmasawnna hna tam tak kan hotuten an thawk a. Sawrkarin District pathum a lo puan tawh, kum 10 chhung hlamchhiaha awm pawh ti felin Deputy Commissioner dah fel vek an ni tawh a, District-in a ken tel office hrang hrangte pawh tam tak dah fel an ni tawh a ni. MNF sawrkar-in hun harsa kara a hmalakna te hi bu tam taka siam tham an ni tawh a ni. Tunah hian kan hotuten theihtawp an chhuahna leh Pathian hruaina zarah MNF chu sawrkarna siam leh tur leh Mizo mipuite tana thawk chhunzawm turin a inpeih fel leh tawh a ni, a ti a.
Hun harsa tam tak lo paltlang tawh, mi zaidam leh dawhthei, hnam thinlung pu mi Chief Minister Pu Zoramthanga kan nei hi a hun taka Pathian remruat a ni tih hai rual a ni lo va, kan unaute thlavang a hauhna avangin a lim pawh an hal hial a, Mizo hnam leh kan unaute thlavang hauhna kawngah Central BJP hotu liante hmaah pawh inchi khat mah a la tawlh ve lo a ni. A kaihhruaina hnuaiah MNF pawhin hma kan la sawn zel a. Mi duhfir leh pharisai ten an tehnaah mi tlawntlai tha zawk zuar thin mahse, thuthlunghlui huna Israel Lal tur Puithiam Samuela’n a zawn tuma Jesaia fate zinga Lal atana fit tak tak an interview tir lai khan, an ngaihtuahna piah lamah beram venga ramhnuaia awm bo mek Davida kha kan Pathianin a thlang zawk tlat a ni. Mi fing leh remhria leh mi tlawntlai tha te, mi dang tlin lohna hmu thei bik riaute aiin kan Pathian, rilru lam entu hian mi inngaitlawm leh taima te a thlang fo thin a ni.
Tun hnaiah Lunglei Municipal Council(LMC) leh VC Bye election-ah kan unau ZPM ten hnehna changin, sawrkar tur thawk a thaw in hun rei tak midang tlin lohna lai hnapui bera nei a, an lo auna chu a rah an seng a, an hlim nui ri pawh a reh fel hmain midang aia tha bika an infak mawi chawpna chu anmahni chhungkua ngei atangin an lo nih bik loh zia atakin a lang chho ta mek a. Politics-a BABEL insang an lo sak khir uaih tawh chu a satute zinga mi ngei ten a thiah leh hna thahnemngai takin an thawk leh mek ta zawk a ni. An kalphung thar zawrh chu anmahni pawl chhung ngeiah innghahna tlak a nih loh zia a lang mek zel a, Zoram tana thawk tur MLA candidate siam pawh inkhual telem nana hmangin nimin lawka an tih fel zawh hlim pawh an duh hun hunah an thlak leh mai thei zel a, thla thum em pawh an committee sang thutlukna vawng him thei lo hian kan ram tana mipui hnena an intiamna te hi kum khat chhung an vawn him theih, mi tamtakin an ring tawh lo a ni. Mizoram political history-ah hetiang em em a party thuneitu sang, PAC member ni pha chin ngat leh hruaitu lawk chin ten MLA inthlan kuma an party an bansan tam leh Elected OB ngei ten an party show cause notice an pek hi a la awm ngai lo va, hei hi kalphung thar a nih chuan MNF chuan kan tlin ve ngai dawn lo a ni, a ti a.
MNF Thalai President chuan, Tuna kan ram politics dinhmun mek enin Zoram mipuiten Congress leh ZPM sawrkarna siam turin an la inpeih loh zia an hmu chho mek a. Pathian leh mipuite zarah MNF hian sawrkarna kan siam leh ngei dawn a ni, tih chu a ni telin a rawn lang chiang chho zel a ni.
Heng zawng zawng te hi rilru lam entu kan Pathianin kan tana min thawhsak a ni tih pawm ila, keimahni lama insiamthat ngaite insiam tha chung zelin, tha tho takin MNF in Mizo hnam tana a thawh chhunzawm zel theihnan, hun tlemte kan la neih chhung hian thahnemngai takin i thawk chhunzawm zel ang u, a ti bawk.
