Mizo hmeichhia social media-a saruaka inpholang thinte sim turin MHIP President-in MHIP hmingin a ngen

Mizo Hmeichhe Insuihkhawmkhawm Pawl (MHIP) Ramlai Block Conference Vawi 7-na chu nimin khan Thenzawl East VC House-ah neih a ni a. MHIP General Headquarters President Ngurmawii Sailo chuan khuallian niin a hmanpui a. Conference hi Ramlai Block MHIP President B. Lalengmawiin a kaihruai a ni.
Khuallian MHIP General Headquarters President Ngurmawii Sailo chuan thu sawiin, Mizoram hmun hrang hrangah MHIP leh VC, YMA leh NGO dangte nen thawhhona tha tak an nei thin lawmawm a tih thu sawiin, Khawvelin a mamawh ber chu a hminga nu mai mai ni lo, Nu tling tak tak an ni tih sawiin, Nute chu chhungkaw hlimna chahbi kawltu kan ni a, khawvel siamtha thei kan ni tih kan hriat a, Hmeichhia ten kan pawimawhna kan hriatthar zel a tul a ni, tiin, chhungkua kalpelin khawtlang a siam,hat theihloh tih hria a, kan fate ah ram leh hnam hmangaihna kan tuh a pawimawh hle a ni, a ti a, Hmeichhe hamthatna leh Women Empowerment kan ti a, helam chauh hawi thei kan ni lo, Women Empowerment kan ti tlut tlut a, kan fate kan ngaihsak a ngai, kan kalkawptir thiam a ngai’ tih MHIP President chuan a sawi bawk.
MHIP President chuan, tunlai khawvel hmasawnna sang zelah social media hmanthiam a pawimawh a, incheina pawh hmeichhia ten fimkhur a pawimawh tih sawiin, hmeichhe saruak thlalak pholan te social media ah hmuh tur a awm ta chu pawi a tih thu sawiin, ZOLANU, SAWMI CHHAKCHHUAK leh midang, Saruak thlalak nena Social Media a inpholang thin zawng zawngte sim turin MHIP hmingin ka ngen a ni, a ti a, hei bakah hian kawng hrang hranga Mizo Hmeichhia, Nu, MHIP ten tan an lak tharna tur te a sawi bawk.
Ramlai Block MHIP te hian Mizo Hmeichhe zinga Padma Shri dawngtu mi chhuanawm, MHIP Hruaitu hlun B. Sangkhumi hnenah chawimawina an hlan bawk.
Ramlai Block MHIP Conference ah hian Khuallian bakah MHIP Sub-Headquarters, Serchhip President Pianthangi leh Padma Shri B. Sangkhumi ten thu an sawi a, an member boral te sunna hun te, MHIP thuthlung sawirualna hun te an hmang a, Chawhnu lamah Rorel Inkhawm neiin, Vantawng Group YMA hruaitute kaihhruaiin, kum 2022-2024 chhunga Ramlai Block MHIP Hruaitu thar thlanna an nei a. Ramlai Block MHIP huamchhungah hian Thenzawl khawchhung leh khawchheh Buangpui, Neihloh, Kanghmun South leh Zote South khuaa MHIP Branch 15 an awm a ni