B. Lalchhanzova, MLA ZPM Star Campaigner chuan kan hmalawka Lok Sabha MP Election – 2024 lo awm tur chungchangah vawiin khan chanchinthar lakhawmtute a kawm a. “Tun kar Zirtawp Ni 19-April 2024 khian kan state aiawh tur Lok Sabha member pakua-na tur MP kan thlang dawn a, ZPM party chuan zoram tana kan hmachhawp te kan tum anga a hlawhtlin theih nan Pu Richard Vanlahmangaiha kum 46 mi chu kan candidate a, ZPM party chuan theihtawp chhuah mekin, zoram mipuite puihna kan ngen a ni. 2023 MLA inthlana beiseina sang tak neia ZPM sawrkar theihna tura phur taka thawk te khan, in besei angin in siam sawrkar chu a kal chho zel ani tih min lo hriat sak dawn nia,” a ti.
“MP inthlan campaign leh inpuahchah chungchangah ZPM party hi thawkrim ber kan nih ka ring a, zoram hmun hrang hrang fanga kan zin kualna ah party dangte chevel hmuh tur an vang hle a, veng leh khaw hrang hrang kan fanna ah ZPM hmalakna tha ti tu, party a inziak lut thar pawh thahnem tak kan neih belh tawh a ni.
“Mipui rilru sukthlek en hian Aizawl mai ni lo, hmun hla zawk lamah ZPM laka beiseina mei hi a alh chho zel tih a hriat viau a, minority te pawn ZPM hi belh tlakah an ngai tan hle tih a hriat theih bawk ani. 2023 MLA inthlan lai vel khan khawpui lian deuhah ZPM thli kha a tleh na hle a, hmun kilkhawr deuh zawka cheng ten ZPM thatna kha an var pawh hman lutuklo a, tunah erawh chuan ZPM a rinna nghah ngamna hi a lentlak a rual chho ta viau mai.
“Nikum 8th December 2023 a ZPM in sawrkar a siam atang khan tha thlah lo in, awm awl hman reng reng lo in hna kan thawk mawlh mawlha, mipui ten min rin ngam ang ngeia kan mawhphurhna hlenchhuah hi kan tum tlata, min mamawhtu mipui te tan biak nuam leh inhawng turin hma kan la a, ZPM Minister te chu biak an nuam, an induh lo, simple takin an nung ve mai a tih te pawh kan hlawh chhuak mek niin kan hria.
“Recognised party zinga central-a zawm nei ve lo party awm chhun chu ZPM party chiah hi kan ni a, MNF te chu BJP nen tang ho in NDA ah fehkawng khat an zawh ho a, ZPM, MP candidate chu huaisen takin national party lian te thuhnuaia kun lo in ram tan parliament ah a tih tur a ti mai dawn a ni. Tualto party te hian Delhi tlang ah khuan zawm pui zuk neih kher hi a tul lo a, tha taka state sawrkar in hna a thawh chuan central sawrkar hi a thil phal em em ani. Eng party emaw zuk zawm kher neih tul ni a mipui zirtir thin te hian dawizepna chi an tuh mek niin ka hria.
“Kum 37 chhung MNF leh congress ten kan state ah mipui ro min rel sak tawh, mipu au aw ten ngaihven a hlawh tawk thin loh avangin zoram mipuite chuan MNF leh Congress party te chu chawlh kan pe ta rih a, party naupang tak ZPM party tang belin kan state chu raltiang ram kai ve turin a insingsa mek a ni,” a ti bawk.
