Aizawl, 17th July, 2023 (Thawhtanni): Vawiin khan ZPM chuan chhung inkhawm hun kan hmang a, Dr. Vanlalthlana, Aizawl North II MLA chuan thu sawiin, Rev. Dr. K. Thanzauva, Vice President chuan ZPM zawm tharte a lawmlut bawk.
Dr. Vanlalthlana, Aizawl North II MLA chuan, “Kan ram hruaitute hian power-a intodelh hi an buaipui tak tak em tih kan zawt a, an thawk lo kan ti lova, an ti zuzi tih erawh kan sawi a ni. Mipuite an nat ruala na ve thin ram hruaitu kan mamawh a, mipuite nat laia in leh lo tha, sum leh pai tuaka hmanhlel ram hruaitu hi he ram hian a mamawh tawh lo a ni,” a ti.
Aizawl North II MLA chuan, “Mizoram politics-ah mipuite hian kan dinhmun an hriat a ngai a. ZPM hian mipuite tibeidawng zawngin kan chhiatna chauh an sawi thin an ti a, keini chuan beiseina thar nei turin mipuite kan ngen zawk a ni. Kan ram dinhmun te, kan sawrkar dinhmun kan sawi hian beiseina a la awm zia kan sawi thin a, kan sawi fo thin tur a ni. Brig. T. Sailo an Bairabi Hydel Project atana hma a lak kha a hnu a miten an ti zuzi a, kum 1998 Ministry-ah khatih laia MPC lam atanga Power Minister khan a rawn tharthawh leh a, an thawhona a tawp a, a zuzi leh a. Tuivai Hydel project pawh tunah a zuzi leh tawh. A hunlaia an tih theih loh hi ro lo rel tawhte hian sawi nawn tawh suh se. Power hi buaipui tak tak an tum em tih hi kan zawhna a ni reng a. Power kan leina atana kan hloh zat hi kum khatah vaibelchhe 400 a ni a, sawrkar Department 47 atangin department budget pumpuia vaibelchhe 400 nei tling lo hi department 40 lai kan nei thung. Power hmanga intodelhna tur tihzuzi a nih thin dan te kan sawi hian engmah ti lo angin kan sawi lo, an ti zuzi a ni tih erawh kan sawi a ni,” a ti.
Dr. Vanlalthlana chuan, “Thingtlanga mi harsa zawkte dinhmun kan hria a, an dinhmun siam tumin hma an la duh miah lo erawh rilru a na a ni. Mipuite kan tanrual a ngai; kan khingpuite hian inthlan dawnah ram hruai dan tur an hre thar thin a. ZPM pawh hian kan tih theih tur chin bak kan sawi dawn lova, mipuiten chance min pek ve thung erawh a ngai. World Class Education min tiamtu khan a hnuah Finance Minister dinhmun a luah leh a, school tlabal tam zia leh fate luhna atan pawha an duh bik loh chuan school tam tak min hnutchhiah a, tunah tih dan thar an rawn hre thut a, mipui hian kan ring ngam dawn em? Nikum khan quality of road infrastructure-ah India ramah kan hniam ber a, kan rorel lai party chuan kan kawngpui that vanga lawmthu sawina resolution House-ah pass turin an rawn pu lut ngam tho a ni. Hna hmanhmawhthlak tiin restricted tender an pe ur ur a, an hna pekte erawh chuan an thawk muang em em si a. Hna hmanhmawhthlak tiin hmahmawh takin Airport cute an sa chim leh rem rum lawi a. An hmanhmawh em avangin lockdown lai pawhin an chawl phal lova, hmanhmawh tak an ni. Mipuite an nat ruala na ve thin ram hruaitu kan mamawh a, mipuite nat laia in leh lo tha, sum leh pai tuaka hmanhlel ram hruaitu hi he ram hian a mamawh tawh lo a ni,” a ti bawk.
Lawm luh tharte atangin Pu K. Chalkhuma, Ex-Treasurer, CYMA chuan thu sawiin, “Mi sawi ringawt leh, mi che vel en ringawt hi a YMA lo ka ti a. Mi siam that hnua lut ve ringawt loin a siam thatu ni turin ZPM hi ka rawn zawm ve a ni. Inthlan dawnah, “Kan tihsualah min ngaidam rawh u, an rawn ti a, kan ngaidam a, ngaihdam ngai bawkin an awm leh thin a, ho tak an ni,” a ti bawk.
Party chhung inkhawm hi Pu B. Vanlalzauva, Adviser chuan a kaihruai a. Upa C. Lalramliana, Dawrpui chuan hunserh hmangin bial hrang hrang viltute atangin report ngaihthlak a ni a, Party chhung inkhawm hi Leader Pu Lalduhoma, Working President Pu K.Sapdanga leh midangte’n an telpui a ni.
