Vawiin ni 18, October, 2024 hian Congress Party chuan Congress Bhavan-ah ‘Friday Political Session’ an hmang a. He hunah hian MPCC President Pu Lal Thanzara chuan thu sawi in, “Nimin lama chanchin thar kan hriat angin, kan Power Minister zahawm tak Pu F. Rodingliana chuan an department hnathawh en kuala a zin chu Assam Riffles ten hmun thumah ngawt tiding in an ti buai a. Kan Minister hian National flag a tar a, Pilot a nei bawk a, amah zuitu a nei bawk. Chuti chunga mipuiin kan thlan lal kan Minister, Assam Riffles ten zahlo taka check tuma an lo tibuai hi a lungchhiat thlak kan ti a, kan dem a ni. Kan sawrkar hian he thil thleng hi rang takin a chhan leh a vang chhuichhuak se, hma la se kan duh a, Assam Riffles hotute pawh hian hetia kan Minister an tibuai hi hekna leh thil dang a awm anih chuan mipui hriatah puangzar turin kan phut a ni.
“Nimin lawkah Chanchinbu ah te kan hmu a, kan Chief Minister in RTI chhanna a en duh vangin a zawt tu in a chhanna a hunah a hmu lo tih te a awm a. RTI chhanna hi file a inziak angin Official ten an chhang mai thin a, tun sawrkarah chuan Minister ten RTI chhanna te an duh anga an ti danglam thin hi a pawi a, mipui in thudik an hriat loh phah thei a ni.
“Hmani lawka thu rinawm tak chanchinbu ah ZPM President chuan Assam Riffles biakin hmun chhuhsak an tum ngai loh thu a sawi ka lo hmu a, thudik anih chuan ka lawm takzet a ni. Hetih lai hian Assam Riffles Commandant in AR Kohhran upa te hnena biakin chhuahsan nana an pek te, AR Kohhran ten tawngtaina thupui a an hman te kha kha thudik a ni em kan hre duh a ni.
“Kan CM in Sinlung Hills Council inthlan lo awm tura a Campaign na-ah Private High School MNF sawrkarin in Provisional Aided a a hlankai, ZPM sawrkarin an sut leh chu SHC inthlanah an chak chuan a hlankai sak a tiam a, an chak loh chuan normal fund bak beisei tur an neih loh thu a sawi te kha a vanduaithlak hle a ni. ZPM an sawrkar dawn loh chuan khilai ah khian eng Development mah a kal dawnlo tihna a ni.
“Kan enchhin sawrkar hianin danglambikna an neih chu, Sumdawng te hian Congress hunlai aiin MNF hunah inhralh a har an ti a, MNF hunlai aiin ZPM hunlai in inhralh a har an ti leh a. An party hotute an invulh a, Board Chairman ah te an indah a, an hlawh 400% ten an tisang a, mipui erawh chu min hrek mek a ni. Hetih lai hian sikul naupang chaw chhum te hlawh ₹1500 erawh chu an pe leh thei si lo a ni.
“Congress party hian mipuite leh Pathian duhsakna in rorelna kan lo chelh tawh thin a, khang hunlai khan kohhran leh mipuite duhloh zawng kan lo ti tawh thin a, chung ah chuan ngaihdam ka dil duh bawk a ni. Congress hi BJP chakna hmangin a la sawrkar ve ngai lova, vawiin ni a kan sawrkar erawh hi chuan BJP chakna hmang an ni a, inthlannaa an sum hman dan atang khan a hriat theih a ni.
“Kan sawrkar mek sawisel fo hi a chakawm loh a, a pawng a puia sawisel hi a puitlin loh thlak a ni. Amaherawh chu duhkhawplohna a len em avang hian sawi a ngai leh thin a.Vawiin ni ah hian kan sawrkar mek hi kan beisei ang an nih loh avang hian thingtlang lama kan kuthnathawktu te leh zoram kohhran mipuite Congress party atanga ram siamtha turin ka sawm duh a ni. Congres party hi India rama sakhaw zalenna duhtu party a ni a, chuvangin Mizoram mipuite hian Congress zui hi an inhmeh a ni.” a ti bawk.