Aizawl, 8.2.2025:
Mizoram Village Council Association President K.Lalngaizuala chuan vawiin khan Aizawl Press Club-ah chanchinthar lakhawmtute kawmin, “Mizoram sorkarin VC term dinglai thla 6 chuang zeta a pawh tawina thupek, All Mizoram Village Council Association aiawha, High Court-a kan khinnaah hnehna kan chang zo ta lo a. Sorkarin VC-te a thuneihna min lek khuma, kan term dinglai min pawh tawi sak dawn hian sorkar hian a chhan leh vang engmah a sawi lo a, keini VC dinglai te min rawn derna emaw, mipui aiawhte rawnna emaw, political party dangte biak rawnna emaw pawh engmah a awm lo a ni,” a ti.
K.Lalngaizuala chuan, “Sorkar hotuten mipui hmaa an thusawi, Chanchinbu leh TV News atanga lo langte atangin, ruling VC ni ve lo, party dang VC dinglaite min ngaih theih lohna a langsar hle a. VC te hian sorkarin tih tur min tuk apiang, mipuite tan theihtawp chhuaha kan thawh reng laiin, sorkar thawhpui duh lo anga sorkar hotute min puhnate khan kan rilru a tina a, khawi VC in nge sorkar thawhpui duh lo tih puang tura sorkar hotute pawh ngenin, chutiang VC an lo awm anih chuan keimahni pawh kan lo inzilhhau tur thute mipui hriatah Press Release te siamin kan lo puang tawh a nih kha.
“Hetiang boruak kara sorkar dinglaiin VC term pawt tawia, a hun hmaa inthlanna buatsaih a tum tlang ta hi party dang VC te min dah bo thuai thuai tumna leh ruling party sawh ngheh tumna liau liau a ni tih a lan avangin, mipui thlan VC te zahawmna vawng hima, democracy ropuina ven him tumin Dan rorelna, High Court kawngkhar kan kik ta a ni.
“Hetihlai hian Sorkar hotuten an thuneihna min lek khum chhan ber, kan term dinglai pawt tawi tura thutlukna min siam khum chhan, an rilru kha Dan rorelna-ah chuan buk tel theih a lo ni si lo a, Dan hmanga kan beihletnaah hnehna kan chang zo ta lo a. Hetihlai hian kan tum ber, Court kawngkhar hial kan kik chhan hi hun lo kal zel tura mipui aiawha thlan VC te zahawmna vawn him a ni a. Hemi kawnga AMVCA member ten theihtawp kan chhuahnaah kan lawm a. Hetihrual hian mipui rorelna bulthut VC te, sorkar apiangin an duh huna an nam thlu zel thei dawn ta hi pawi kan tih lai ber a ni.
“High Court-a kan thubuai thehluh ngaihtuahnaah hian January ni 30 (kar kalta Ningani) khan hearing neih a ni a, khami ni khan kan ukil te leh sorkar ukil te thu a ngaihthlak tawn ve ve bakah Court hian sorkar file leh note sheet te a enfiah tel a, a duh ang a hmuh loh avangin February ni 3, 2025 (Thawhtanni) ah sorkar file hi enfiah tura chhawp chhuak leh turin sorkar ukil chu a hriattir a, January ni 7, 2025 (Zirtawpni) ah court hian a thutlukna a puang ta a ni.
“VC dinglaite min namthluk chhan leh a hun hmaa inthlanna min neih luih pui chhan ber nia Mizoram sorkar dinglaiin Court-a a sawi chu 15th Finance Commission atanga Mizoram sorkarin Post Devolution Revenue Deficit Grant (PDRDG) a hmuh tlak hniam zel vang a ni tih a ni a, hei hi pawm a harsa hle a. PDRDG a tlak hniam zel rual hian 15th Finance Commission atanga Mizoramin sum a hmuhna dang, Share of Taxes, Rural Local Body Grant, Urban Local Body Grant leh State Disaster Risk Management Fund hnuaia sum hmuhte chu a pung zel thung a. Sorkar kum thar 2025-26 chhung khian 15th Finance Commission atanga Mizoram sorkarin sum hmuh tur zawng zawng chu cheng vbc 6120 a ni a, hei hi kumin sorkar kum kal lai 2024-2025 -a hmuh tur cheng vbc 5932 aiin cheng vbc 188 laiin a tam zawk a ni. Sorkar kum kallaia sum hmuh tur chhut lawk aia sorkar kum thara sum hmuh tur chhut lawk a tam zawk daih laia a hun taka inthlanna buatsaih theih loh chhan chhuanlama sum hmuhna head pakhat tlahniam awm chhun chhuanlama hman hi a pawmawm loh hle.
“Mizoram sorkarin hmanhmawh taka inthlanna min neih luihpui hun tur hi zirlaite hun pawimawh nen a in tih buai chiah bawk avangin ruahmanna fel tak awm lova, hmanhmawh taka ruling party ni ve lo VC te min thlak thuai thuai tumna, Party bil sorkar sawh ngheh tumna vang chauh a ni tih hi a chiang hle. School Calendar 2024-25 -ah Primary School leh Middle School te Final Exam hun hi 17-28.2.2025 tih a ni a, final exam tura an inbuatsaih nasat ngaih lai tak a ni.
“High School leh Higher Secondary School Final Exam hun hi 8-18.2.2025 a ni a. HSLC Exam – Practical tih hun tura MBSE in a lo ruat 12.2.2025 chu vote thlak ni tur a nih tak avangin MBSE in 5.2.2025 ah khan a sawn hma a ngai ta hial a. VC leh LC Election buaipuitu (Official) atan ruatah hian 90% hi Zirtirtu leh Head of Institution te an ni. Polling Station/Booth atan School Building deuh hlir hman a ni dawn bawk a.
“School Calendar hi hriat lawk vek a ni chungin, chumi nena in ti buai chiaha inthlanna buatsaih ngai turin VC Term dinglai hi 19th Feb. 2025 a tawp turin Mizoram sorkar hian a puan hnan tlat mai a ni.
“Sorkar dinglaiin VC te min hmuh dan leh min enkawl mek dan hi mak kan ti hle. Tunhnai maiah pawh AMVCA -a kan member, Hnahlan, Thekpui leh Sialhawk VC te sorkarin nikum lama a lo thiahna thupek chu Court in hnawlin, an hna pangngai chhunzawmtir nghal turin sorkar hriattir nghal mahse, vawiin thleng hian sorkarin an hna a la chhunzawmtir duh ta chuang lo a ni.
Heng zawng zawngte thlir hian, Mizoram sorkarin VC term dinglai pawt tawia inthlanna min neih luihpui tur chungchangah hian Dan hnuaiah hnehna chang mahse, mipui thinlungah erawh hnehna an chang chuang lovin kan hria a. Kan tum ber, VC te hi mipuite thlan, mipui rorelna bulthut kan ni tih mipuite hriat thartir kawngah kan hlawhtling thovin kan inhria a, mipui thlante zahawmna venhim tuma kan beihnaah min thlawptu leh min duhsaktu zawng zawngte chungah AMVCA aiawhin lawmthu ka sawi a ni,” a ti bawk.
