MPYCC chuan thuchhuah siamin, “Mipuiin an in zawrhna sang tak leh intiamkamna tam tak avanga enchhin tura an thlan ZPM sorkar hi engmah a nih loh ziaa lang mek a. ZPM sorkar hian mahni tih dik loh sawimawi leh sawimamin an term an hmang ral ngei dawn tih a chiang a. ZPM Star Campaigner Pu P.L Liandinga’n ZPM office-ah ngei, ‘Kalphung thar ani anga, a takah chuan tihdan danglam deuh, kalphung danglam tak tak si lo ani thei. Kalphung thar kan tia nga, a hming kan vuah hran anga, tlemin a tihdan kan ti danglam anga, mahsela a chhunga a zia tak tak chu kalphung hlui ang tho kha a la ni thei a.’ a tih chu a dik zia a lan chhoh tak avangin MLA Candidate tur, a dam lohna pawh amah rawn loa, a dam lo tia an paih tak Pu PL Liandinga sawi chu a takin kan hmu mek a ni.
“David Sailo nia an rin, Pu Lalduhoma’n, kan thian a ni, dikna duhtu ngei pawh thla nga chauh a thawh hnuah an ban leh thut a, ZPM Workers te’n tawngkam chhe tinrengin an umzui duh hi Congress Thalai chuan a dem takzet a, ZPM chu Mizoram Politics-a tawngkam chhe tinreng ching chhuaktu-ah a ngai a ni.
“MNF Sorkar-ah khan thil ho te teah Mizoram hruaitu lu ber Chief Minister Office (CMO) atang leh a kaihhruai Minister-te atanga mi hniam zawk leh thiltithei ve lote vau leh rikrap zawnga lalna leh thuneihna hmang sual a, Communist ram leh Dictator lalna ram ang maia FIR thehluh nasa takin a lo thleng tawh a. Phuahchawp mai maia an kal thu House zahawm takah meuh sawichhuak hial kha a ni a. Hetiang taka mipui zah lotu lakah hian thubuai siam tur ni se vawi engemawzat thubuai thehluhna tur a awm. North Korea rama mipuiin engmah an sawi ngam ve lohna ramah ZPM sorkar hian Mizoram hi a siam mek a. Thil tul lo leh ho mai maia kan Police-te buaina siam sakna leh anmahni thlang tlingtu mipui dikna palzutnaah MPYCC chuan a ngai a ni.
“Assembly House-ah ngei thudik lo a sawi avanga ngaihdam dil hial Chief Minister Pu Lalduhoma pawh Chief Minister a nih hma leh a nih hnua thudik tawk lo leh belhchian dawl lo a sawi avanga FIR thehluhna tur tam tak a awm tawh. Chutiang bawkin an Minister leh MLA te pawh thu belhchian dawl lo an sawi avanga FIR thehluhna tur tam tak a awm. Hetiang a nih laia anmahni sawiseltu, mi chak lo zawkte laka thuneihna hmang sual a, thubuai thehluh leh police chakna hmanga inrikrap a ni zel hi Congress thalai chuan a hrethiam thei lo a ni. Hetiang Sorkar, Dictator sorkar, mipuite dikna leh an chanvo palzutna hi BJP leh MNF sorkar kal ang chiahin ZPM hi a kal dawn tih a chiang. BJP pawhin Media thununin kumin 2024 Lok Sabha MP inthlanpui neihah amahni chan thatna tur zawngin an kal pui a, inthlanpui neih tawha Exit Poll rintlak loh leh dik loh ber kum a thleng hial ani.
“May ni 1.2024 khan kan unaute harsatna a hun leh tha, a sum senga tanpui a, chhanchhuah hnathawktu Lalchhuanzela Account chu ringhlelin MPYCC ten Chief Minister an hnuhnaah Chief Minister-in Mizo tlangval Lalchhuanzela account-ah Rs 35,000/- Agency ten tangkhangte lo haw nan an thun a tih chu nasa taka rikrapin Minister-in SBI, Mission Veng Bank-a Zela Bank Account te an lo check sak a. April ni 11.2024 khan ZPM Legal Board/Department chuan an Office-ah Press Conference neiin Tuesday nightmare leh MNF Sorkar laia ZPM party in namenloa an lawm em em, David Sailo te lakah Criminal Complaint an thehluh tur thu in an rikrap zui bawk.
“Chief Minister Pu Lalduhoma ngeiin ZPM MLA candidate atana nasa saka leh a mi hriat chian, Er. Vanlalruata Sailo, Durtlang Leitan, January ni 22, 2023-a Mizoram State Project Monitoring Committee Secretary atana a appoint, David Sailo emaw ti a, “kan ṭhian ṭha a ni, bei suh u” a lo tih tawh, mahse ZPM sorkara Open Tender LEM, Departmental Works LEM, GFR, CPWD Works Manual leh The Mizoram Public Procurement Rules 2020 páwngsual a nih duh lo tu chu ZPM hotute’n an duh anga an tal theih loh vangin “Bang rawh se” an tih angin thla 5 awrh chauh an chhawr hnuah an duh anga mipui sum an chheprelh theih tak loh avangin a ka hup theihna a nih ringa an ban hi Congress Thalai chuan mak a tiin ZPM sorkar hian dikna an duh loh zia leh mahni in haivur an tum zia chiang takin a tilang a ni.
“ZPM sorkar hnuaiah Political transfer, F.I.R hmanga in rikrapna, sorkar duh khawp lohna sawi apiang Jail-a khung, in vauna, democracy rah behna, Dan palzuta in rikrap, Open Tender LEM, Departmental Works LEM, GFR, CPWD Works Manual leh The Mizoram Public Procurement Rules 2020 páwngsual te nasa taka thleng hi a pawi takzet a. Democracy ram, secular kan nihnaah mitinin zalenna kan nei vek a, India danpuiin freedom of speech (thusawi kawnga zalenna) zau tak min pek angin mitinin kan duh zawng sawichhuah theihna, sorkar kalphung leh ram hruaitute sawisel theihna zalenna zau tak kan nei ṭheuh a. Midik an ngawih rengna ramah mipui himna leh dikna palzut a ni thin. Supreme Court pawhin sorkar sawiseltute laka sorkar inluling thin hi ngaimawhin, October 5, 2020 (Thawhtanni) khan thuchhuah a siam hial tawh a. Sorkar sawiselna zawng zawng hi sawrkar pawi sawina (sedition) leh intihhming chhiatna (defamation) a puh zel tur a ni lo, ‘Mi tuin emaw sorkar sawiselna a siam emaw in sedition or defamation law hmanga vau ve tur a ni lo’ a ti hial a ni.
“India Danpuiin min humhalhna zahder sak eih lova roreltuten anmahni thlangtu mipui chunga inlulin nan an hmang hi mipui zalenna rahbeh sakna, nakin thlenga ram leh hnam kal zel tura nghawng ṭha lo tak nei thei a ni a. Defamation case file theih, FIR thehluh theih tih avanga thil ṭul lo leh thil ho lam deuh deuhah diriam leh hmusit taka Pu Lalduhoma’n kan Police te an thlamuanpuiawm lo, kut vung ber bur, ke vung ber bur a tih te ngei hmangin mipui an rikrap a, hei hian pawisak an neih loh zia a tichiang a ni.
“Mahni tih dik loh leh mahni thusawi lo hang zeal kal lo hian Chief Minister Pu Lalduhoma leh ZPM sorkar hian Kristian te ngai thei lo tak BJP nena in zawmin Narendra Modi nen thuk takin an in suihzawm tawh bawk a. Leimin avanga harsatna thleng thin laka kan him zawk nan Kristian Millionaire a hmelhriat te nen khan Mizoram khawpui thar a rang lama din thuai thuai zawk tur te, Lau lui Fest Tival a rang lama hman a nih theih nan te, Oil leh Gas harsatna a thlen lohna turin Mizoram hnuaia Oil leh Gas tam tak a hriat te la chhuak thuai thuai tur leh Kuhva chingtute harsatna sutkian a nih theihna tura Kuhva tih rona hmun hrang hranga din a, a hriak sawr chhuah a nih thuai thuai theihna tura hma la turin MPYCC chuan a phut a ni.
“Congress a sorkar loh apianga Mizoramah buaina leh harsatna, mipui thlabarna leh him lohna a thleng ziah hi a vanduaithlak takzet a. ZPM sorkar hian mipuite hnena an in zawrhna Manifesto tih hlawhtlin aia Defamation case file leh FIR hmanga mipui rikrap an dah pawimawh zawk hi sim se la, mipui hnena an in zawrhna leh intiamkamna te tihlawhtling zawk turin MPYCC chuan a phut a. Hetianga mipui zahlohna leh tham lohna, an dikna leh zalenna rahbehna hi Congress thalai chuan na takin a do dawn a, mipuite dikna humhalh a, an zahawmna hum turin hma na takin a la zui dawn a ni,” an ti bawk.
