Mi pathum hnenah ‘Golden Arm Award’ hlan

National Integrated Forum of Artists and Activists (NIFAA) INDIA chuan nikum 23, March 2021 khan ram zalenna sualtu ram tana martar pathumte: Bhagat Singh, Rajguru leh Sukhdev te hriat reng nân ‘Blood and plasma donation’ India ram pum huapin a huaihawt a, world record thar a siam.
He campaign hriat reng nân hian Mizoram Chapter NIFAA chuan National Headquarters-a rawtna a thlen bawhzuiin, Mizorama thisen pe tam ber te hnenah he chawimawina ‘Golden Arm Award’ hi ni 10.6.2022, 8:30 pm khan biakhmuhtheih (Zoom) kaltlangin mi pathum RC Rokhum, C. Lalremruata leh Rebecca Saimawii te hnenah a hlan a ni.
He biakhmuhtheih inkhawmna hi Alex Zosangliana Secretary Mizoram chapter chuan kaihruaiin, NIFAA hmalakna tlangpui report a pe a. Mizoram Chapter President Jacinta Vanlalengzami chuan thusawiin, mi dangte nun chhan nana thisen petute chu chawimawi phu thu leh an mihring puite tana an hlutzia sawiin, Mizo mipa thisen pe RC Rokhum leh C. Lalremruata ten vawi 83 ve ve mamawhte tan thisen an pe tawh chu a chhuan thu a sawi a, Hnam dang hmeichhiaten thisen pek an hlauh a, an tih em em laia Rebecca Saimawii’n vawi 75 lai mai thisen a pe thei chu hmeichhiate tana entawn tlak, hmahruaitu a nih zia a sawi bakah, NE India a ni emaw, India ram pum huap a ni emaw, ani aia thisen pe tam hmeichhe zinga a la hriat loh thu a sawi tel bawk a ni.
Pritpal Singh Pannu, National chairman chuan Award dawngtute a lawmpui thu leh a chhuan thu sawiin, Mizoram state chapter a duhsak thu a sawi bawk a. Samvedna blood donation nikuma neiha NIFAA tawiawmtu College Student Union te, NSS , NIFAA District branch-te leh JJ Cultural Club leh mimal hrang hrangte hnenah lawmthu sawiin, International Life Saver Award hlanna inkhawm chu Mizoram-ah neih thuai an tum thu a sawi.