Mizo Hindi Zirlai Pawl (MHZP) chuan, “Hindi Stream hian harsatna namen lo alo tawh hnuin kan Sorkar leh Education Minister Pu Lalchhandama Ralte, hmalakna azarah Hindi zirna chuan rahbi thar a rap mek a, chutih lalin ‘High School leh Middle School Hindi Teacher (Under-Centrally Sponsored Scheme) Agreement Sl.no 12. (iv)’ ngai pawimawh lova aikal la luite chungah sorkar hian huai takin, an hna atanga ban (Terminate) thleng pawha action la turin MHZP chuan kan sorkar hi a ngenin a phut nghal a ni.
“Lamherh HSS (RMSA) SDEO, Saitual-a Pensioner rawih nawn leh hian appointment a hmuh atanga tun thlenga aikal a lak avangin sorkar chuan explanation a call tawh bakah, show cause notice, Ni 4th Aug, 2023 hma ngeia chhang tura hun pek ani a. Heti chung hian, Sairengpuii Sailo hian Transfer a la dil tho nia hriat a la ni leh zel hian amah ruaitu Sorkar leh Department a zah lo mai nilovin, engahmah a ngai lovah MHZP chuan a ngai a, a la thutak (serious) hle a ni. Mahni hnaa tui tawh lo leh thawk tha peih lo hi kan sorkar hian tun thla (August,2023) chhung ngei hian a hna atanga terminate/ban a nih ngei theih nan hma la tawh turin MHZP chuan a ngenin a phut a ni. Sorkar atanga chanchin lawmawm hriattur a awm loh zel chuan, a thawhna khua VEC te nen tangrualin, a tul anih chuan School khar thleng pawha hma lak a ni ang.
“MHZP hian englai mahin aikal lak hi a pawmpui ngai lova, rinawm leh taima taka mahni thawhnaa awmte hi MHZP chuan chhuanawm a ti hle a. Aikal late hian an Agreement ber an bawhchhiat chuan MHZP chuan a enzui ang a, a tul angin hma ala ngam a, hma ala ngei dawn a ni. Chuvangin, Sorkar hmalakna hi MHZP chuan ngun takin a thlir reng a ni,” an ti.
