Vawiin khan Zo Re-Unification Organisation (ZORO) chuan thuchhuah siamin, “Ni 7, November 2024 zan khan Meitei te chuan Zairawn khua, Jeribam District, Manipur a Zohnahthlak khua chu an run a. Pi Zosangkim Hmar, Pu Ngurthansang Hmar nupui chu nasa taka sawisa in, rawng takin an that mai bakah an pawngsual zui a ni. Hetiang ang kan thisen zawmpui kan unaute chungah a thleng hi Zo Re-Unification Organisation (ZORO) chuan na a tiin, pawi a ti takzet a ni,” an ti.
ZORO chuan, “Pi Lalsangkim Hmar in a kalsan tak a chhung leh khat zawng zawngte kan tawrhpui hle a, Pathianin awmpui mawlh rawh se. Tin, ni 11, November 2024 tlai lama kan unau thalai rual 10 lai Borobekra-Jakhuradhar, Jeribam District, Manipur-a CRPF in an kap hlum hi pawi kan ti hle a, kan unaute kap hlum tu CRPF te hi kan dem hle a. Mipuite veng him tura dahin mipui min sawisa ta mai hi kan hre thiam lo hle a ni.
“Manipur State chhunga Meitei leh kan unaute inkarah inhmuhthiam lohna nasa tak thleng mek chuan ziaawm lam a pan dawn emaw kan tih laia kan unaute chungah tualthihna rapthlak tak a thleng hi ZORO chuan pawi kan ti hle a. Hetiang a Meitei in kan unaute chunga kut an thlak zel dawn a nih chuan kan ngawi mai mai dawn lova, kan unaute thlavang hauh a penchhuak turin kan in peih reng a, Mizoram state chhung a awm Meitei pawh lo fimklhur turin kan chah nghal bawk a ni.
“Zofate hian kil hrang hrang atangin beihna kan tawk nasa ta hle a, khawvel hmun hrang hranga awm Zofate inngeih leh lungrual lehzuala kan awm a, hmalam pan chungah kan tanrual lehzual a tul hle a. Zofate chu unau thlahkhat kan nih hria a, lungrual taka ke pen ho zel turin kan insawm nghal bawk a ni,” an ti bawk.
