Mizoram Board of School Education chuan vawiin khan High School Leaving Certificate (HSLC) exam result a ti chhuak a, exam zawng zawng zinga zaa 76.68 an pass a. MNF, ZPM Thalai, NSUI, MZP leh MSU te chuan hlawhtlinna changtute zawng zawng an lawmpui tih sawiin, hlawhtlinna la chang ve rih lote chu beidawng mai lova, tumruhna leh taimakna nena hlawhtlinna in chan ngei theih nan tanla zel turin an fuih a ni.
Matric Exam -a pakhatna PC Lalthakimi
HSLC result chhuakah hian nikum aiin zirlai pass an thahnem zawk a. Nikum khan zirlai HSLC Exam hmachhawn zingah zaa 73.37 an pass a ni.
HSLC exam result chhuakah hian pakhatna chu P.C Lalthakimi, KD High School, Saron Veng Aizawl a ni a, mark 500 ah 479 a hmu a, exam titha zual top 10 ah mi 24 an lang a ni.
Kuminah hian exam beitu hi zirlai 18,946 niin zirlai 14527 in an pass-a, HSLC pass thar te hi Distinction-a pass mi 1,343, First Division-a pass mi 3763, Second Division-a pass mi 5785 leh Third Division-a pass 3636 an ni a, Pass zingah hian Second Division-a pass an tam ber a ni.
HSLC pass thar te hi hmeichhia 7548 niin mipa 6819 an ni a. Kumin HSLC exam-ah hian zirlai 14367 in hlawhtlinna an chang zo lo a, compartmental chance pek zirlai 60 an awm bawk a ni.
Kumin HSLC exam ah hian Mipa aiin hmeichhia exam hmachhawn an tam zawk a pass zat pawh hmeichhia tam zawkin mipa aia hmeichhe pass mi 707 in an tam a ni. Deficit school in ti tha ber in za zela 92.62 percent pass an awm a, private candidate pass percentage hniam ber in 46.65 percent an pass a ni. Aizawl District ah pass percentage tam ber in za zela 86.09 percent an pass a, Lawngtlai district chu district mal ah pass percentage hniam ber niin za zela 56.19 percent pass an awm a ni.
MBSE Chairman JH Zoremthanga chuan MBSE pisaah chanchinbumite a kawmna ah kumina compartment 60 awm te chu admission an tlai loh nan exam buatsaih thuai a nih tur thu a sawi a, Compartment exam bakah hian HSLC result complain hun ni 7 chhung hawn a ni dawn a ti a, kumin exam-ah zawhna har zawng tehnaa a zangkhai deuh, LOTS zawhna zaa 60 leh a bak zawng zaa 40 chu tlema har deuh Application leh HOTS atanga siam a nih thu a sawi a, zirnain hma a sawn zel nan HOTS zawhna chu telh tam deuh deuh tura ruahman a nih thu a sawi bawk.
Kumin Matric Exam -a pakhatna dinhmun hauhtu chuan PC Lalthakimi a sikul luhna KD High School zirtirtute kaihhruaina leh Pathian vang liau liaua pakhatna dinhmun chang thei a nih thu a sawi.
