Vawiin April ni 23, 2025 Nilaini hian Serchhip Kawnpui VC Hall ah ‘Serchhip District chhunga MNF VC tling tharte chawimawina hun’ hman a ni. He hun hi Pu Lalchhandama Ralte, Leader of Opposition leh MNF Vice President ni bawk chuan a hmanpui. Serchhip District chhunga MNF VC tling tharte hi an vaiin 61 an ni. Pu Lalchhandama Ralte, Pu Er.Lalrinawma, Pu Lalremruata Chhangte, Pu J.Malsawmzuala Vanchhawng leh Pu Lalawmpuia ten thu an sawi bakah, VC tlingtharte Chawimawina thuziak an hlan a ni.
Pu Lalchhandama Ralte chuan thusawiin, ZPM sorkar hneh taka an tlin hnu lawka VC inthlana kan party mi tling tharte chawimawina hun buatsaih a ni hi lawmawm ka ti a. Opposition kan ni chung hian kan phurtlang em em a ni tih a chiang. MNF-te hi khawiah mah mikhual cheta che tur kan ni lova, ram neitu dik tak kan ni. VC inthlan zawh takah MNF-in hnehna pangngai taka kan chang hian ram neitu kan nihzia a tichiang a ni.
VC tling tharte leh party kalkhawmte chu kum 2028-ah hnehna kan chan leh ngei theih nan theihtawp chhuah turin ka ngen a che u.
Pu Chhantea chuan VC tling tharte chu opposition ni chunga mipuiin in khawtlang hruai tura an thlan chhuahte in ni a. Pathian leh kan ram tan titu kan nih avangin Rinawmna nen theihtawpin ram tan bei ang che u tiin fuihna thu a sawi.
Leader of Opposition chuan Sorkarna chelh mektu ZPM Party chungchang sawiin, ‘Opposition an nih lai khan Sorkar kalta zawng zawng tlin lohna leh hmelhemna kher chhuakin, social media-ah an rak chuah chuah a. Ṭha bik nia insawiin, kohhran leh pawl dang behchhanin Pathian ram din tur anga intiam an ni a. Sorkar tawhte ang lo takin ‘Kan ti ve lo ang tih’ tiam an ngah hle. Mahse, an sorkar hnuah enge thleng? Kan ti lo ang an tih apiang an ti a, an tih tur tiam an ti lo thung a. Sorkar kal tawh an selte ai mahin an fawm ṭawp a, party induhsak bikna kawngah nise a che-na na an ni ta a. Mi tam tak beidawng leh sorkar hnathawkte beng tithleptu an ni mek thung, a ti.
MNF Vice President chuan ZPM chu Nationalism kengtu nia insawi kha an ni a, an sorkar hnuah nationalism nekpuar thil a thleng fova, chutih hunah chuan hnam tana an din ngam lohzia a lang ta zeuh zeuh a. Thil fuh lo a awmin sorkar kal tawh an mawhpuh a, a tha lamah anmahni thawh angin an sawi leh thung a. Mawhphurhna la ngam lo sorkar kan hrawn mek a ni. Mizoram tana beitu pawl hrang hrang, NGO ten he sorkarah hian mak tih an ngah, an beidawng, an ring tawk lo mek tih sawiin ‘ZPM hi chhum rei lote lo langa ral leh tur ang hi an ni’ a ti.
Kalkhawm mipuite fuihna sawiin, ‘MNF hian hruaitu nei tha ber kan ni tih i pawm ang u. Ram leh hnam tana bei a, thatlai hun zawng zawng hmang ral hruaitu kan nei. Pathian hian a hun takah min hruai chhuakin, chakna min pe leh dawn’ a ti bawk.
