Vawiin Dt 16 October, 2024 khan Patriotic Revolutionary Movement (PRM) leh Mizo Village Volunteer (MVV) hruaitute chuan Aizawl Press Club ah chanchinthar lakhawmtute kawmin, “Joint Meeting chuan nguntaka kan unau Manipur State-a Mizo tlang mite ram leilung atanga, Kristiante nuaibo tura a thiltih hi kan dodal tlat a, hetianga Manipur State Ministry in kan unau Mizote, Meitei hel, heng Arambai tengol Meitei lipun, Coco mite leh State force ten mihring nunna tam tak zahpahna nei hauh lova an la leh vawiin thlenga an hmalakna hi kei ni PRM leh MVV chuan ngawihbopui kan tum lova, kan unau Mizote Kristianna dodal a thah chimih an tumna hi dodal turin a tul anga hmalak zel hi kan turn a ni,” an ti.
PRM leh MVV hruaitute chuan, “Manipur State Ministry in hetiang taka kan unau Mizo Kristiante chunga tawrhna an thlen hi khawvel hmun hrang hranga Mizote chunga a thlen tir angah kan ngai a, Mizo tawh phawt chunga harsatna leh buaina thleng hi kan zavai chunga thleng a ni tih hria in, Mizo tawh phawt chu tan rual a, feikhat chawi a phawkhat vuan tlang theuh turin kan insawmin kan ngen che u a, a tawp thleng a kan hmelma do tlang tar hian Mizo mipui zawng zawng kan ngen che u a ni.
“Manipur sorkar hian, tunhma ata tawh Mizote chungah harsatna thlen tuma a hmathlir tihhlawhtlin nan, Manipur Tangkhulte leh Kuki te chanchin, chibing anga inbeihna a lo chawk chhuak tawh thin bawk a. Tin, kan unau Kuki leh Paite inkarah pawh hem thlak tawhin nasa takin a inbeih tir tawh bawk a, chumi kal zelah vawin ni ngeiah pawh, kan unau kristiante chu state chhung atanga hnawhchhuah vek tumin, an ram luahte a neih theih nan, ramdang mi, foreigner a puhin opium chingah dawtin khawvel hmaah, anmahni thil tih ngei thup nan media kaltlangin bihruk a la tumzui bawk a ni.
“Hmanlai ata tawh Meitei lalte duhthlanna ngei avangin, schedule tribe an lo hnawl tawh chu, neih let leh tuma an beihna kawngah, mizote chu diklo takin min puh a, keini mizote schedule tribe te tangrual, kan pi pute atanga an lo sahzau, kan rochun ngei chu humhim tuma muang taka kan awm laiin, N. Biren Singh volunteer Arambai Tengol, Meitei Lipun, Coco mi leh Meitei mipui ten, tlang mite hlut em em, Anglo Kuki War hriatrengna Gate chu rawn halin thingtlang khuate rawn beiin, In leh lo hal sakin, bungruate ru chhuak a, kan nulate hruai chhuak in, an pawngsuai a, khawlaiah saruakin kawng an zawhpui in hmeichhia te dikna leh zahawmna chu diriam taka kalpuiin, an that zui bawk a, hetiang taka kan unau, kan fanu, kan farnu te chunga meiteite khawsakna hi, keini Patriotic Revolutionary leh Mizo Village Volunteer-te chuan thlir liam har kan tiin, heng mizote chung a thil thleng mek te hi Meiteite leh Kuki te inkar buaina anga lantir a tum hi kan pawm lova, Mizote leh Mitei buaina zawk anih angin Mizo hnam pum ang zawkin he buaina hi kan kalpui zel tawh dawn a ni.
“Manipur State sorkara Mizote dikna chanvo kan kristianna lungphum zahlo taka Meitei ten pawi an sawi hnuah pawh kan la ngawi tlat a, Manipur State Ministry hian buaina hi chingfel aia buaina punlun zawng a hma a la zui zel anih chuan a tawp thlenga hmachhawn turin kan inpeih reng a ni.
“Kan unau Manipur te, Myanmar te, Bangladesh leh hmun hrang hranga mite harsatna leh buaina sutkian a lo nih theih nan, khawvel ram hrang hrang a Mizote kan theihna zawn theuhah tanrualna kan neih theih nan Ni. 28-29 October, 2024 hian ‘Freedom Concert – Charity Concert’ neih tum a ni a, he hunah hian kan unaute tan luang chhuak turin Mizo zawng zawng kan sawmin kan ngen tak meuh meuh a ni,” an ti bawk.