Regional rural bank-te chuan sawrkar laipui Ministry of Finance-ah thil phut hrang hrang neiin naktuk – September 23 hian lungawilohna lantirin bank an khar dawn a. Mizoram Rural Bank pawhin lungawilohna hi an zawm ve dawn.
All India Regional Rural Bank Employees Association (AIRRBEA) a tel an nih angin Joint Council of MRB Union thuchhuak chuan regional rural bank (RRB) ten ram pum huap lungawilohna September 23-a neih tura a tih chu Mizoram Rural Bank-a thawktute pawhin an awmna hmun theuhah an zawm ve dawn tih a sawi.
An lungawiloh chhan leh sawrkara an thilphut an sawi danin, RRB-te sponsor bank nen inzawm tawh loa National Rural Bank of India (NRBI) din; a hun taka promotion buatsaih, hnaruak hnawhkhah, recruitment tih thuai; casual worker-te sawrkar laipui order hnuhnung ber anga minimum wage hlawh pek phalsak leh an hna dahngheh (regularise) sak thuai; Supreme Court thupek angin computer increment /(FPP) la dawng lo RRB-te hnena pek; compassionate scheme a nihna ang taka hman tlan; pension scheme hlui anga hnathawktu tharte pension pek; sponsor bank atanga deputation-a RRB-a lokal, chairman tih chauh lo chu, tihtawp (stop) tura ngen; RRB shareholder tihdanglam tumna nasa taka dodal te a ni.
