Lengpui Airport venhim hna chu vawiin khan Mizoram DGP Pu Anil Shukla chuan CISF (Central Industrial Security Force) kutah a hlan. Kum 1999 atang khan Lengpui Airport venhim hna hi Mizoram State Police leh Central Reserve Police Force (CRPF) te’n an lo kalpui char char a ni.
Lengpui Airport security hna inhlan chhawnna pual hian inkhawm tawi buatsaih niin, khuallian DGP Pu Anil Shukla chuan CISF te’n hna tha tak an thawh theih a duhsak thu sawiin, Mizoram chu ram dang pahnih nen a ramri intawm a nih avangin dan phalloh thil tawlhruk a tam thu te sawiin, hemi kawngah hian Airport lama duty te pawh an fimkhur viau thin a tul thu a sawi a ni.
He huna hian Pu Vijay Prakash, IG CISF/APS-I HQr, New Delhi leh Pu Deepak Verma, DIG AP (E&NE) HQr, Kolkata te’n thu an sawi bawk a. Lengpui Airport chu a hmangtu passenger an lo tam belh zel avangin leh, sorkar laipuiin ram puma civil aviation facility te venhimna tihchangtlun zawk a duhna nen inrem taka CISF hi Lengpui Airport a dah a nih thu sawiin, airport venhim hna thawh kawnga CISF in tawnhriat thuk tak a neih thu leh Lengpui Airport ah pawh thataka an thawh ngei tur thu te an sawi bawk.
Tunah hian Lengpui Airport ah CISF personnel 121 an duty dawn a ni.
Programme ah hian Pu C. Lalzahngoa, SP Security, Mizoram Police; Pu Rohan Botre, Joint Dy. Director, SIB, Pu Saidenga, Airport Director, Lengpui; Pu Pranav Kumar, Commandant, CISF; Pu Harish Singh Nayal, Dy. Commandant, CISF bakah Airport Wing (GAD), CRPF, I&PR Airport Authority of India, Indigo, Alliance Air, IOC, BPCL, AIASL, AIESL, MET atangin aiawhte an tel a. Pu Lalrohlua, Aviation Director chuan lawmthu sawi in hun a khar a ni.
