Mizoram Larsap Gen (Dr) Vijay Kumar Singh, PVSM, AVSM, YSM (Retd) chuan vawiin khan Republic Day Camp (RDC) 2025 a tel Mizo NCC Cadet 58 te hmuahna leh; an puala lawmpuina hun Circular Lawn, Raj Bhavan-ah a buatsaih. He hun hi Chief Minister Pu Lalduhoma leh Sports & Youth Services Minister Pu Lalnghinglova Hmar te pawhin an telpui bawk.
He hunah hian Larsap Gen (Dr) Vijay Kumar Singh, PVSM, AVSM, YSM (Retd) chuan India ram pum huap leh ngaihhlut hlawh tak Republic Day Camp (RDC) a Mizoram NCC Cadet-te an tel thei chu ropui a tih thu leh, hemi tura Mizorama NCC unit hrang hrangte thawhrimna, inpekna leh rawngbawlnate chu chhuanawm a tih thu sawiin, NCC chuan thalaite nunah inthununna, hruaitu zia leh ram hmangaihna a tuh a ni, a ti. NCC chu ram hruaitu chherchhuaktu pawimawh tak a lo nih tawh thin thu leh NCC ah chuan taksa leh sipai lam kaihhnawih intuaihriamna mai bakah kawng engkima hmasawnna ngaihpawimawh a ni a, training tha tak tak an neih thin avangin armed force-ahte pawh an tlin phah thin a ni, a ti bawk.
Larsap chuan NCC ah amah ngei pawh a lo tel tawh thu leh a ngaihhlut thu sawiin, Mizoramah thalai tam zawkte’n NCC an zawma hma an sawn pui ngei a beisei thu a sawi a. NCC Directorate NER te hlawhtlinna chu cadet mai bakah nu leh pate tana chhuanawm tak a nih thu sawiin, NCC hmalakna reng rengah ram leh hnam dah pawimawh hmasak a ni thin chu entawntlak a tih thu a sawi a. NCC chuan thalaite nun a tha zawngin a kaihruai a, hetiang hmalakna hi nakin zel atan pawh kan thlawp tlat a tul a ni, a ti bawk.
He hunah hian Maj Gen Gagan Deep, Addl. Director General (ADG) of NCC, NE Region chuan report pein lawmthu a sawi a. Governor leh Chief Minister-te hian Republic Day Camp-a tel NCC Cadet-te hnenah chawimawina an hlan bakah an tawnhriatte zawtin an kawm bawk.
Kumin Republic Day Camp (RDC) ah hian Mizoram atangin NCC Cadet 58; 20 Mizo Bn. NCC Pipe Band Cadet 45, 1 Mizo Bn. NCC Cadet 2, 2 Mizo Bn. NCC Cadet 1, 1 Mizo Air (Flying) Squadron NCC Cadet 3, Thal Sainik Camp-a tel 20 Mizo Bn. NCC Cadet 1 leh All India Vayu Sainik Camp-a tel 1 Mizo Air (Flying) Squadron NCC Cadet 6 te an tel a ni.
