Vawiin khan MPCC chuan thuchhuah siamin, “May ni 27, 2022 khan Millenium Centre ah Excise Dept chuan Grape Wine tam tham tak an man a. Hemi ṭum hian Pi Lalhriatpuii, Dawrpui Vengthar ta pawh man sakin an man sak hlut zawng hi cheng nuai 22 vel a ni. Grape wine an man sak tak Pi Lalhriatpuii’n mangang tak chunga sumdawnna dang neih a tum mek laia a boral ta thut mai hi Congress Party chuan pawi a tiin a kalsan tak a chhungte kan tuarpui tak zet a ni.
“Mizoram Sorkarin Grape chingtute tan Wine siam chhuahna (Winery) din sakin kuthnathawktute tam takin eizawn nan an hmang chho mek a. Hetih laia Winery-a Wine siam chhuahte man si lova, sum tam tak senga a zuar chhuaktute ta man a ni hi Congress Party chuan a pawi a tiin a hrethiam thei lo a ni.
“June ni 3, 2022 ah Excise & Narcotic Minister Dr. K. Beichhua chuan Excise Enforcement staff-te chu grape wine man tura kal an nih loh thu a sawi hnuah wine an man sakte cheng sangthum ṭheuh an chawi tir leh si te kha a mak hle a. Zu man telsak anga dawta an puhnate phei chu hriatthiam theihah kan ngai lo. March ni 25, 2022-a Council of Minister ṭhukhawmin MLP Draft Rules, 2022 kha pawm tawh mah se, Government Gazetted-ah chhuah ala nih loh avangin hman theih ala nih loh lai a, dan tlawhchhan tur mumal nei mang lova, khawsak harsa zawkte chunga an thuneihna an hmang sual hi a dik lo a, chumi avanga thihna hial a lo thleng ta hi Congress Party chuan pawi a tiin Excise Minister Dr. K. Beichhua hian moral responsibility la a, bang turin kan phût tlat a ni. Kuthnathawktute leh sumdawngte lamah Congress Party hi a ṭang tlat dawn a ni.
“Mizoram sorkar kan hrawn mek hian Grape Wine chungchangah a dinna ti chiang vat turin kan phut a. Bialtu MLA Dr. ZR Thiamsanga pawhin Grape Wine siam chhuaktute tana hmalak zel a intiam laia vawiin ni thleng maia Grape Wine man sa pek kir ala awm lo te hi Congress Party chuan a ngai thu tak hle a. Grape Wine an man sakte hnena a rang lama pe kir turin E & ND Minister Dr. K. Beichhua leh Dr. ZR Thiamsanga-te kan phut bakah Grape Wine an man sak avanga rilru hahna nasa tak tuara boral ta Pi Lalhriatpuii chhungte leh Grape wine an man sakte hnena zangnadawmna pe ngei turin Congress Party chuan Mizoram Sorkar kan phut a ni. Pi Hriatpuii thihna hian Mizoram kuthnathawktu Grape chingtute leh Mizoram thar Grape Wine zuartute tan rah tha chhuah mawlh rawh se,” an ti bawk.
