Vawiin khan Lalduhoma, MLA chuan Champhai a Grape Winery a tlawh a, Champhai Grape Growers Society hruaitute nen inkawmhona hun an nei.
Lalduhoma chuan, “Kan ram chhunga thar ngei grape kan ram chhûngah a sawngbawlna mumal tak kan nei hi kan lawm hle a. Chutih laia harsatna in tawk mai hi pawi kan tiin hriatthiam har kan ti a; Food Safety and Standard Authority of India in grape wine hi food item-ah a puang a ni. Winery pawh hi food processing unit a ngaih a ni a, he in winery pawh hi zu siamna factory a ni lo va, food proceesing unit zinga mi a ni,” a ti. “Kan thenawm state te pawhin hetiang lamah hian hma an la nasa em em a, state sawrkar pawhin nasa takin a pui a ni. Mizoramah hian kum 2005 atang khan grape hi eizawnna atan kan hmang tan a. Hnahlan leh Champhaiah pawh chhungkaw tam takin eizawnna atan kan hmang a, sawrkar hriatpuinaa din a ni tih hi chiang takin kan sawi duh a. Horticulture department hi nodal department atan hmangin nodal officer te neiin chhawmdawlna awm thei ang ang te pawh an buaipui che u a, sawrkar hriatpuiin hma nasa takin in laa sawrkar pawhin a hriatpui che u a ni,” a ti bawk.
Lalduhoma chuan, “Mizoram chhung mai ni lo, ram pawn thlenga thawnchhuah dan turte ngaihtuahin hma nasa takin in la mek tih pawh kan hria a. Tuna hetiang dinhmun in thleng ta mai hi pawi kan ti em em a, theihtawpa lo tlangau pui che u hi tun dinhmunah chuan kan tih theih tawk a ni hrih a, tuna kan thlen chinah hi chuan lungawina a awm ta lo a, vendor te tan pawh zawrh tur lak chhuah a phurawm ta lo va, harsatna lian tak in tawk mek a nih hi,” a ti a. “Pathian leh mipui zarah thuneihna kan chang a nih chuan keini chuan kan policy hnuaiah tanpuina kan pe dawn che u a. Enterpreneurship hi keini chuan kan ngai pawimah a, bul tanpui tlak an nih a, project hlawhtling tur a nih chuan kan pui dawn a ni. Sawrkar hi guarantor-ah a tang mai dawn a, thalai thiamna nei si bul tanna nei lo te kan chawikang dawn a ni,” a ti bawk.
Lalduhoma chuan, “Tun hnaiah grape wine zuartu Pi Lalhriatpuii chu nuai 20 chuang man lai a grape wine zawrh man sak a ni a, chumi avang chuan rilru leh taksaah harsatna te tawkin a nunna hial a lo chân hi a pawi kan ti tak meuh meuh a, social media-ah te a ralna tur veh bur te khawnin buatsaih sak a ni a, heng hi keini chuan kan support a, kan neih ang ang te i thawh ang u tiin kan in chah duh a ni,” a ti bawk.
