BJP Mizoram chuan vawiin 7th August 2023 (Monday) hian BJP State Office ah “National Handloom Day” pualin hun hmangin, Pi Lalbiakkimi, State Mahila Morcha President-in inkhawm a kaihruaia, Dr. Zonuntluanga, CSM&PC General Secretary chuan Awareness on Handloom Department & Government Schemes tih thupui hmangin Paper Present a nei a, Pu Vanlalhmuaka State President-in thusawina hun leh Handloom Weaver-te nen interaction neiin, Pu Lalmalsawma State Executive Member, National Handloom Day i/c in Vote of thanks a nei bawk.
Pu Vanlalhmuaka State President chuan, “India ramah Handloom Day hman a ni a, Mizoram ah pawh chutiangin Handloom Day kan han hmang thei hi a lawmawm hle a, Kum 5 chhungin Handloom hmanga eizawng tur mi sing-hnih atanga sing-thum chu BJP Mizoram chuan kan target a ni,” a ti.
Pu Hmuaka chuan, “vawiin ah hian Mizoram ah Kuthnathawktu tam tak chu hlawhtlinna kawng dapin harsa takin hma an la a, Nimahsela an mahni puitu tur State Sorkar hian kan Kuthnathawktute hi a nihna ang turin an pui thei lo hi a hahthlâk hle a, vawiin ah pawh hian Handloom Weaver te hian an mahni puihna tur Central aṭanga hailuh hi Mizoram Sorkar hian puih harsa an ti hle hi a mak a ni. State Sorkar hian mahni thar chhuah leh dehchhuah hmang lo chuan intodelhna kawng a awm thei dawn lo tih hi a hrelo a nih chuan a vanduaithlâk hle dawn a ni, keini BJP te chuan kumin 2023 MLA General Election lo awm tur ah hian Kuthnathawktu hrang hrang te hian kan Ram dinthar lehna tur atan BJP hi kan thlangtling a nih ngat chuan Kuthnathawktute mai nilo, kan State sum dehchhuah chu nasa takin a pung anga, vawiina kan State dinhmun Leiba ngah ber nihna aṭanga talchhuah hi BJP Mizoram chuan kan thiltum lian êm êm a ni,” a ti a.
Pu Hmuaka chuan sawi chhunzawmin, “Central chuan Handloom Weaver te’n mahni ke-a an dinchhuahna turin sum tam tak an dah a, chung sum hai luhna kawnga Sorkar muthlu mek chu BJP Sorkar chuan kan kai harh anga, Handloom hmanga kan dehchhuah te chu Mizoram pawnah nasa takin kan thawnchhuak anga, Mizoram sum bawm pawh a tha dawn a ni,” a ti bawk.
