Ex-minister Zodintluanga Ralte chuan Mizoramah party pathum kalphung a awm tak avangin mipuiin duhthlan tur an ngah tawh avangin an thikthu a chhe hle tawh a, ZPM hi kum nga bak an sorkar lovang tiin a sawi.
Saitual, Khawzawl leh Champhai tlangdunga Congress party hruaitute nen an inkawmnaah nimin khan he thu hi sawiin Pu Zodintluanga chuan: “ZPM hian an sorkar tirh phat atangin an key an la sang em em a, an intiam nasat em avangin mipui thikthu a chhe hle dawn a, thutiam hlen theih loh tur tam tak an neih avangin kunm nga bak an sorkar dawn lo,” a ti.
“Kum nga hnuah chuan Mizoram mipuite’n Congress-ah bawk rinna an nghat leh dawn a, chumi tur chuan Congress party mipuite leh a hminga hruaitute’n ngaihtuahna thar leh fim zawk kan hman a, khawvel changkang leh ngaihtuahna thar zawk lo chhuak mila Mizoram hmasawnna kan kalpui theih dan tur kan ngaihtuah a ngai a ni,” Pu Zodintluanga chuan a ti.
Pu Zodintluanga chuan MNF party khan sum chakna hmanga sorkar leh ngei tuma nasa taka an bei chung khan MLA 10 an nei tawk a, ZPM party in an tlinpui kumah MLA 27 an rawn nei thei tawk a. An sorkar tan atangin a ki an la sang lutuk a, an tawng an umpha lo mek a ni, a ti.
“Restricted tender hmanga hna pek hahipa sawiseltute chuan tun hnai maiah tender pawh chhuah loin hna tam tak an sem mek a, ZPM kalphung thar hi mipuiin a nihna tak an hmu thuai dawn,” Pu Zodintluanga chuan a ti.
Kum nga chhunga eng chhit man tihsan loh te, kum nga chhunga kawlphetha pe chhuak thei tura luipui panga khuah an tum thu an sawite Mizoram mipuiten kan la hrereng a, kan lo chik hle dawn a ni, tiin Pu Zodintluanga chuan ZPM intiamkamna chungchang a sawi a. “Mizorama chief minister kan neih tawh zinga adviser ngah ber chief minister chu ZPM chief minister a ni,” PU Zodintluanga chuan a ti bawk.
Ex-minister, term li MLA lo ni tawh Pu Zodintluanga Ralte hian party mi leh sate tlawhin Mizoram fanchhuah programme a hmang mek a, kar hmasa lam khan Siaha, Lawngtlai leh Lunglei te a tlawh hnuah tunah hian Champhai tlangdung fangin a thang leh mek a ni.
