Chief Minister Zoramthanga chuan vawiin khan Aizawl Sustainable Urban Transport Project (ASUTP) chungchang a nikhat awh Workshop buatsaih, Mizoram Rural Bank Auditorium, MINECO, a neih chu a khuallian niin a hawng a. Dy. Chief Minister Tawnluia chu khhualzahawm a ni.
Workshop thupui chu ‘Review of Existing Scenario & Finalising Mobility Indicators’ tih a ni. He project hi UD& PA Department hnuaiah Asian Development Bank puihna in Project Management Unit in a enkawl a ni.
Chief Minister chuan khawpui thang zel avanga kawngpui tawt ta lutuk chu tihziaawm dan zawk zawnga kawng hrang hranga hma lak a nih dan sawiin, vawiin workshop buatsaih chuan mithiamte rilru chawk tho a, Aizawl tana tha tur ber ngaihtuahna a thlen ngei a beisei thu a sawi a. Khawpui hmasawnna chu a chhunga cheng mihringte tan harsatna ni lovin awlsamna a thlen zawk tur a nih avangin nakin zela tangkaina leh awlsamna min thlen thei tur hmasawnna ruhrel din a pawimawh a tih thu a sawi a. PAHOSS leh hmalakna dang hrang hrang siam a lo nih tawh dan te, kawngpui lunlai tawt lutuk tih thawl nana project lian tham hrang hrang buaipui mek leh khawpui chhehvela lirthei lian tan terminal siam te, sawrkar laipuia Ministry of Road Transport and Highways changtu Minister hnena kawng siamthat leh siam belh mamawhna te a thlen thu Chief Minister hian a sawi bawk a. Tun hma lama theih loh ang kan ngaih thin tam tak kha tunah a theih zia kan hmu zel tih sawiin, Workshop hlawkthlak deuh an hman a duhsak thu a sawi a ni.
Deputy Chief Minister Tawnluia, UD & PA Department changtu chuan Aizawl khawpui thang zel chuan he Aizawl Sustainable Urban Transport Project siam a tul phah thu sawiin, Mizoram leilung in a zir avanga hmasawnna ruhrel liantham tak tak din a harsat thu te a sawi a. Chuti chung chuan theihna lai zawn zel a, ram danga hmalak tawhna te en chungin changtlung tak siam chu a theih thu a sawi a. Dy. Chief Minister chuan hmasawnna tur project thawh chu a changtlung ngei ngei tur a ni tiin, hlawk duh avanga quality lam ngaihthah chu tih miahloh tur a ni tiin, mipui tan vek a nih avanga thawh zawh hun tura intiam bawhpelh vak te chu tih loh tur a nih thu a sawi.
Workshop hawnna programme-ah hian AMC Mayor Lalrinenga Sailo pawhin thu sawiin, thingtlang atanga khawpuia pemlut tam avangn Aizawl khawpui tun hnaia nasa taka a than thu leh, chutiang ang dinhmun chu hmun dangah pawh hmuh a nih thin thu a sawi a. Heng avang hian khawpui chhunga inkalpawhna a pawimawh zual dan te, lirthei leh ke a kalte tana him leh awlsam zawka kalphung siamthat a tul thu te sawiin, Mayor chuan hmalakna siam chuan mi harsate thleng phak a nih tur thu a sawi a. Public transport te pawh, a hmangtu tam zawk chu mi harsate an ni thin a, chuan man to tak tuk a fuh ber loh thin thu te a sawi bawk.
Workshop ah hian I&PR Minister Lalruatkima, Aizawl West-I MLA Zothantluanga, Aizawl South-III MLA Prof. F. Lalnunmawia te an tel bawk a. Sawrkar department hrang hrang aiawhte, MZU aiawh te leh NGO hrang hrang aiawh te bakah khawpui inkalpawhna/chetvelna lam heng Ropeway, Elevator leh Escalator lama thiamna bik neite an tel bawk. H. Lianzela, Director, UD& PA Department & Additional Project Director, PMU, ASUTP chuan lawmthu sawiin he Workshop Inaugural session hi a khar a ni.
