Congress Party chuan thuchhuah siamin, “Mizoramin Group of Twenty (G20) Business Meeting pawimawh tak a thleng hi Congress Party chuan lawmawm kan ti a, Mizoramin hlawkna lian tak a neih theih pawh kan beisei tlat a ni,” an ti.
Thuchhuahah chuan, “MNF sorkarin G-20 palai lo kal mikhualte kalna tur kawngpui dunga nitin eichawp zawng, dawrkai Hawker-te March ni 1 atanga ni 3 chhung an inpho a khap hi nitin eichawp zawng, mi harsa leh rethei zawkte rahbehna dik tak a ni a. Kan nihna dik tak thup tuma hetianga mi harsa zawkte sum lakluhna tikhaihlak zawnga hmalakna hi hriatthiam theihah Congress party chuan kan ngai lo a ni.
“Mizoram hian khual tha chi hrang hrangte, meeting pawimawh tak takte pawh a lo thleng tawh thin a. Tun anga mi rethei zawkte rah behna hi a la thleng ngai lo. Hun lo kal leh zel turah pawh thleng tawh lo se kan duh a ni.
Mizote hi kan nihna ang taka kan lanchhuah ngam a ngai zawk niin kan hria a, chu chu Mizoram tan a tha zawk niah kan ngai a ni,” tiin a tarlang bawk.
