Kawngchhe hnuaiah leh Motor rui chunga zirlaite Science Congress-a an tel hram hram avangin khuallian a lawm

Khawzawl District huap a ni 2 awh 30th Children’s Science Congress-2022, Khawzawl Zaingen YMA Hall-a neih chu Nilaini tlai khan zawh fel a ni.
Science Congress kharna inkhawmah District Project Coordinator, Samagra Shiksha, Khawzawl District K. Lalsiamliani chuan Science Congress a hlawhtlin theihna tura zirlai naupangte tel tirtu School-te chungah lawmthu a sawi a. Nakum Science Congress-ah chuan tha leh zualin zirlaiten an tih a beisei thu leh kawngchhe hnuaiah leh Motor rui chunga zirlaite an tel hram hram chu lawmawm tiin, Education Director pawhin an thahnemngaihnate hriatpuiin a lawm hle tih a sawi bawk
Khawzawl District Level Science Congress vawi 4-naah Junior Category-ah Isak Lalpianfela leh Lalrinkima, Govt. Middle School-II, Khawzawl-te chu pakhatna niin Lalrinsangi, PES Vengthar Pastorate chu pahnihna a ni a, Lalrinpuii, Govt. Chhawrtui Middle School leh Vanlalmalsawmdawngzela, Govt. Middle School Tualte-te chu pathumna an ni.
Senior Category-ah chuan Vanlalhriatpuii leh Ruthi Zomuansangi, Govt. Khawzawl High School-te chu pakhatna niin Ida Malsawmtluangi, PES, Vengthar Pastorate chu pahnihna a ni a, T. Lalremsangi leh Lalrinhlui, Tualte High School-te chu pathumna an ni.
Samagra Shiksa, Khawzawl District leh Science Teachers Association of Mizoram (STAM) tangkawp buatsaih District Level Children’s Science Congress-ah hian Junior Category-ah School 17 telin Senior Level-ah School 9 an tel a, Khawzawl khawpui chhung bakah District chhung khaw hrang hrang atangin School an tel tha hle a ni.