Dated 27th January,2025 :
Vawiin chawhma dar 11:00 khan ZPM chuan Pary Office ah chhung inkhawm an hmang a, thusawitu Pu C. Lalsawivunga, Minister, LAD, Vety Dept etc. chuan, “Sawrkar laipui Finance Commission atanga Grant kan hmuhtea tlem tial tial avang leh inthlan hautak zet mai buatsaih a ngaih thin avangin mipuite phurrit kan siam loh nan leh kan sum hmuh ang angte dik zawka kan kalpui theih nan Mizoram sawrkar chuan inthlan hun kan puang fel a, chutihlaia High Court-a min khing hi a vanduaithlak takzet a ni” a ti.
LAD Minister Pu Sawivunga chuan, “ Kum 2024-ah Mizoramin Cyclone Remal avangin chhiatna nasa tak kan tuar a, fur pui a lo thlenin Mizoramin kawng hrang hrangah harsatna kan tawk thin. Sawrkar kum thar lo awm turah hian a lan danin inthlan pawimawh tak tak pali hmachhawn tur a awm a, August-ah Village Council, September-ah Local Council, November – December-ah LADC, kum a lo thar anga AMC inthlan a lo awm leh dawn a ni. Inthlan hi a hautak em em a, sawrkar sum a kalral nasat thin avang leh mipuiten an tawrh loh theih dan ber tur ngaihtuahin sawrkar chuan inthlan hun a puang hma ta a ni. Kum 2020-ah pawh Covid avangin inthlan hun pawhtlai a lo ni tawh a, danin thuneihna min pekin angin tunah pawh hian kan ram dinhmun ngun taka ngaihtuah chungin inthlan hun kan puang ta a ni,” a ti.
Pu Sawivunga chuan, “Kum khat awrh sawrkarna kan chan chinah kohhran hrang hrangte tawngtaipuina kan dawng nasa em em a, he sawrkar Pathianin min kaihhruai zia pawh a hmuh theih a ni. Inthlang ram kan nih angin India rama pawimawh ber chu inthlan a ni a, mipuiten kan mawhphurhna tha taka kan hlen a ngai. Kan hma lawkah VC & LC Election kan hmachhawn dawn a, February 12-ah vote thlak a ni ang a, February 19-ah tualchhung sawrkar apiang fel vek tawh dawn a ni. Election hi a pawimawh em em a, vote thlak thei tawh phawt chuan khua leh tui kan nihna anga kan mawhphurhna a nih avangin thahnem ngaitakin vote thlak theuh ang u, tiin zoram mipuite ka ngen a ni. Term tam tak sawrkara rorelna lo chelh tawhten kum khat leka upa mipui sawrkar heti tak maia min bei a, min khaikhin leh heti khawpa min beisei sang hi a lawmawm takzet a ni. Pu Lal Duhawma kaihhruai he sawrkar hian kan la hmuh ngai loh hmasawnna thar; he Zoramin a hriat reng tawh tur a hnutchhiah chho mawlh mawlh mek a, lawmawm leh zual chu kan intiam ang ngeiin eirukna thila hmingchhia an la awm lo te, vana kan chanchin sawi huna huai leh dik taka kan sawi ngam tur sulhnu kan insiam mek hi a lawmawm a, Pathian kaihhruaina a ni,” a ti a. “ Sum kan renchem thiam a, a hmanna tur dik taka kan hman zel a pawimawh takzet a, sum pawhpen leh a kalna tur ni lova kaltirte hi kan Chief Minister duh loh ber niin hma pawh a la ngam zel dawn a, a hnung zui turin keini pawhin theih tawp kan chhuah a ngai a ni. Sawrkar hmasate hnathawh chhunzawm tlak a awm a nih chuan kan chhunzawm zel dawn a, kan chhunzawm mek bawk a, siamthat ngai leh ennawn ngai tam tak awmte a tul anga hma lain kan siamtha chho mek zel a ni,” a ti bawk.
