Dampa Group YMA inkhawmpui chu ni 12-14, March 2025 khan Damparengpui khuaah neih a ni a. Pu Lalhmachhuana President CYMA chuan hmanpuiin, Central Executive Committee member (CEC) 5 in an tawiawm a ni.
Vantlang inkhawm ni 13, March 2025 khan neih a ni a. Pu B. Ramngaihzuala President Dampa Group YMA in kaihruaiin, Rev. Lalawmawia, PCI Damparengpui in hunserh a hmang a ni.
He huna thusawitu Central YMA President Pu Lalhmachhuana chuan, “Kan unau kan thenawm ram ten harsatna an tawk mek a, a lo tuamhlawm nasa ber tu chu YMA kan ni. Zofate tan hian YMA hi a hlu hle a, a la hlu tual tual dawn a ni. YMA hlutna chhan hi CYMA hruaitute vang a ni lo a, YMA chu Pathian rinchhana din a ni a, YMA member zawng zawng avangin a hlu a ni. YMA hi Mizo zawng zawng, kohhran pawh thliar hrang lova, political party pawh huapzo pawl a ni a, a ropuiin kan hnam tan chuan a hlu a ni”.a ti a.
Central YMA President chuan, “Kan ramah ruihhlo a hluar nasa em em a, kan rama ruihhlo nasa taka pung mek hi lo dang a, lo veng thei tu chu YMA kan ni. Ruihhlo avangin mipa kan thi nasa em em a, hetiang a nih chuan kan nula ten pasal neih tur an hmu lo mai dawn a, hnamdang pasala an nei ang tih pawh a hlauhawm a chimralin kan la awm thuai ang tih a hlauhawm a ni. Mizote hi chimrala kan awm loh nan YMA memberte nasa lehzuala kan tan tlan a ngai a ni.”a ti
Pu Chhuantea chuan hnamdang sumdawng chungchang sawiin, Aizawl khawpui chhung hi hnamdang sumdawngin min awp deuh thaw tawh a ni. Mizo thahnem takin kan hming hawhin hnamdang kan sumdawn tir a, hei hi kan hnam tan a pawi a ni. Aizawl berah sumdawnnaa min chim ral chuan Mizoram hmundang pawh chak takin min la chim dawn a ni. Dan lova sumdawng an tam em em a, dan lova sumdawng kan hriat leh kan hmuh chuan YMA memberte chuan lo man a, lo hnawhchhuah zel mai tur a ni, a ti bawk.
Dampa Group YMA huamchhungah hian Branch YMA 12 awmin Group YMA huamchhungah hian tun dinhmunah YMA member mipa 2563 leh Hmeichhia member 1172 awmin member zawng zawng hi 3735 an awm mek a ni. Kum 2025 – 2027 chhung hruaitu tur thlanna an nei nghal bawk.
