“Kan Ram kan Hnam leh kan Sakhua hi BJP leh a sangawizawn puite rorelna hnuaiah hian a him lo ta tak zet a. India ram hmun hrang hranga thil thlen dan leh kan Prime Minister leh Home Minister te thil tih duh leh tih duh loh te, an tawng chhuah duh leh duh loh dan te hian rinhlelh rual loh in a ti lang ta,” Lalbiakzama, INC Candidate chuan a ti.
INC hminga Lok Sabha MP Candidate chuan, “India ram innghahna thulaibu (Idea of India) tih nghin in a awm a, kan ram Danpui constitution leh Democracy pawh palzut mek a ni. Hnamtin ten zalen tak leh in dawhtawn chunga, kan sakhua theuh thlamuang tak a kan biak theih na leh kan rinna te hlauhna tel lo a kan tlangau pui theih na ram, kan hnam dan theuh te in zahtawn sak chunga kan chen hona ram hian chhan a ngai ta a ni.
“Hindu kulmuk ten Hindu Lalram din a mi dang zawng an thuhnuai a dah a, sakhaw in zahtawn sakna, hnam tenau zawk te in humhimna leh mimal dikna chanvo in palzut sakna ram, One Nation, One Religion, One Culture din an tum mek hi thu leh hla a kan dodal theih lai hian theihtawp kan chhuah a ngai ta anih hi.
“Chuvangin, BJP leh RSS ten Hindustan ah hian Hindu te dinhmun derthawng ah kan ding ta tia an in fuih mek lai hian, keini hnam tlem leh ual au tak a kan sakhua min cheksawlh sak tu te hi India ram a an lal zel loh nan tan kan lak a ngai tak zet tawh a. BJP leh a thurualpui te paih thla theitu chu India ramin zalenna a neih tirh a kan ram Danpui, Constitution min lo duan sak tu Indian National Congress leh a thurualpui te chauh hi an ni. An kut ti chak tur leh kan Ram kan Hnam kan Sakhua him zel na turin kan hma in thlanpui lo thleng tur ah hian rilru fimtak nen mitin te vote thlak turin ka ngen tak meuh meuh che u a ni.
“Mizoram dung leh vang han fan hian kan Agriculture infrastructure tha din hi hna hmasa a kan neih a hun tawh. Englai mai pawh a Central sorkar a vehbur khawn reng tur anga in ngaihna hi a hun tawh lo. Buh leh thlai kan thar theih na hmun awl zau tak kan la neih te hi kawngpui in pawh ila, hmanraw tha leh tunlai thiamna nen cheibawl in mahni in todelh na kawngah hmalak tak tak a pawimawh ta.
“Sorkar enkawl sumdawnna, kan hlawkpui lem loh te pawh hi kan thalaite society leh farm din tir a an kut a kan dah a hun tawh. Sorkar nen in remna fel tak a siam in enkawl se, hlawk zawk leh chhenfak awm zawk ani ngei ngei ang, kan thalaite hian hna thawh hi an chak a, remchanna erawh kan siam sak a ngai mai a ni.
“Central atanga schemes hrang hrang kan dawn leh kan hai chhuah te hi keimahni chhawr leh hmasawn na tur ani tih hre reng in diktak a enkawl leh tih puitlin ngei tum a kan thawh a pawimawh in a tul a ni.
“A tawp ber ah chuan engang pawn in develop in hmasawnna te nei mahila, kan dikna chanvo palzut sak kan nih na leh kan rin Pathian zalen leh thlamuang tak a kan biak leh a thu kan hril theih loh na ram ah chuan nuam kan ti tak tak thei dawn em ni tih hi kan in zawhna ni rawh se,” a ti bawk.
