Hmelma lian ber ti duh tan pawh a tih theih ang chu. Inthlan a hnai chho zel a, hetiang lam hi a pawimawh tlat.
MANIFESTO :
Hmanah kan ram hruaitu pa ber pakhat chuan Interview naah “Manifesto te chu kan in ziah ṭhat siak mai mai a lawm, mipui pawh hian kan chhiar zui tak takin ka hre lo” a lo ti hmiah tawh a, mahse mipui zingah Manifesto chu sawi loh, Budget pawh chik peih tak tak kan pung a, hetiang ngaihdan nei Politician kan hrawn mek te chu an chep telh telh a, an ṭawngvai ta fo mai a nih hi.
Sorkar in kum 5 chhunga chak taka a bawhzui tura a duan, a ngaih pawimawh tur te chu Point hrang hranga ziakin a BÛ in an chhuah ta a, mipui a huap zo hle a, a ṭha ṭhekṭhawk ṭhin hle a ni. Tu Party Manifesto pawh hi bawhzui tlak, mipui tan liau liau vek niin a lang ṭhin. Mahse tlin tuk aṭangin kan khup thak deuh vek a, Manifesto chu sawi loh, Budget Session neih zawh chiaha Budget zat pawh zawh tlak loh, sawi dik thei manglo MLA kan nei fo hian Manifesto ah chuan beisei sanna tur Sorkar kan la hrawn lo a ni maithei.
FLAGSHIP :
Hei hi kan rama roreltuten hun engngemaw chen aṭang tawha kan uar em em, State dang hmasawn zawt zawt mek ten an uar ve lutuk loh a ni. NLUP aṭangin MIP ah kan lut a, NLUP ah bawk kan lut leh a, NEDP kan ti leh a, tunah SEDP a lâr leh a. Inthlan apianga Manifesto ṭha mangkheng kan neih ngheng tlatin a aia ṭha zawk leh kan uar mangkheng Flagship chu Mizoṭawng emaw tih mai turin kan uar ta a ni.
MANIFESTO VS FLAGSHIP :
MNF Manifesto 2018 ka thlirna chu January 2022 khan ka ziak a, Heading 6 lai nei, chumi hnuaia Point 59 tarlanah Hlawhtlin 7 (11.8%), Hlawhtling lo 38 (64%), Kalphung pangngai nisa 11 (18.6%) leh Manifesto kalha hmalakna 5 a awm thu ka lo chhuah tawh a ni.
Heta ṭang hian kum 3 pel tawh Ministry in Manifesto kan ngaihsak loh zia a lang chiang hle a, tun hnai eng Ministry ah pawh hetiang hi kan kal dan tlangpui a ni. Mahse tun Ministry hian Election Manifesto a an neih ah chuan FLSGSHIP, SEDP vawi 3 chiah an tarlan erawh a lar hle a, SEDP Board pawh phuahbelh leh tur vang khawpin kan din nasa a ni.
HMELMA LIAN A NIHNA :
Central aṭanga kan Budget pawn lama Source hrana kan dawn pawh nilo, kan State Budget aṭanga Party mi leh sa in duhsakna tur System chhe fahran mai FLAGSHIP kan ching chhuak hi kan ram chhiatna bul a ni.
AAP pawhin Manifesto ṭha takin an kalpui mai a, hneh takin an tling mai a ni. Keini pawh hian Manifesto zawk, mipui huap zo tura kan duan hi bawhzui mai ila, dawt leh dawt lo nena in zawrh erh fo hi a ngai nang. Tlin tuk atangin Manifesto chu thûl mawngah kan dah a, Party inhaivurna, THERHLO, a mawi zawnga FLAGSHIP kan tih lamah kan tlan ta hum hum ṭhin a, Therhlo ni miau hek, din chhuahpui lawp hmuh tur tlemte, chupawh DINGCHHUAK han tih em tur nilo chu chhiar tham lek an ni a, Vote zawnna leh Party mi insawhnghehna hmanruaah chiah a tlaktlai a, kan Ram chu Flagship chuan Sorkar lo awm leh zel tur thlengin LEIBA hmangin min sawp ta a ni.
Kan Politician te chet dan phung en hi chuan retheite hi min kai tho nawlh tak tak mai ang a, an therhlo mamawh lo lêk hian kan awm ang tih an hlau emaw tih tur a nih ang chiahin kan Flagship te hi a chhum bûl thei hle a, belhchian pawh a dawl tak tak ngai lo. Sorkar tuk atanga Flagship hmanga chet chhuah tumte chuan Term tawp dawn lamah hmalakna phuailuai takin kan che pelh rem rum a, kan tlakpui ṭhin a nih hi. Kan tumah kan chiang em!! Heng therhlo in a man khawm tlat te hi tlinpui tham an nih loh zia MIP leh NLUP ah Zoram mipuiin an hmelhriat tawh a ni.
TLIPNA :
Flagship hmang hian kan ram hi sawp tawh lo ila, a leh pek Sorkar zel tur (a ngai pawh lo nise) tana phurrit siam phahna Project hi a tha lo a, Party mi sawhnghehna tur leh Party dang sawmchhuahna Project ai chuan RAM DINHMUN SAWHNGHEHNA tur, Mipui khawsak kân dawrhna tur Manifesto buaipui nghal mam mam theih tur, Board pawhin pawisa an dawn mang lohna Flagship nilo, mipui thleng nghal râwng tur MANIFESTO buaipui tawh zawk ila, kan Party mi, tlinna tham ni hlek lo te ai chuan kan RAM leh MIPUI dinhmun sawhnghehna chuan a tlintir zel zawk ang che u.