“Hmingchhiat phah khawpa politic kan hman loh nan mithar lo ni ila, kan ram tana hnam rohlu nih i tum ang u” : Lalsawta
Dt 15.1.2024 (Thawhtanni) hian Congress party chuan Congress Bhavan hawnna Programme kan hmang a, he hunah hian MPCC President Pu Lalsawta chuan thu sawiin, βKan party-in inthlanah khan theihtawp kan chhuah a, Manifesto tha takte kan duang a, hna nasa takin kan thawk a, mahse mipui in keini lam an hawi lo. Mipui in ZPM lam an hawi a, chhin an duh a, an chhin phawt loh chuan an lungawi lo a ni.
ZPM hian an intiam ang ngeiin tumah duhsak bik nei lovin thawk se ka duh a, Minister ten an thutiam an lak ah khan, mi zawng zawng angkhata en turin an intiam a. Chuvangin party induhsakna te ti ve lo va, mihausa leh midiklo te hruaikawi mai mai theih nilo turin ka duh a, political will nei se, ram tana tha lo tilo ngam turin ka duh a,huaisen takin an tihtur ti ngam turin ka duh a ni.
Kan hriat thin angin, ram thuhmun nei, hnam khat ni si South Korea leh North Korea te pawh kan hria, ram rorelna tha South Korea ram chu an hausa em em a, an thenawm maia an unau te chenna North Korea erawh chu khawvel a ram hrehawm ber zinga mi a ni. Ram hruaitute leh an ram enkawl dan hi a pawimawh em em a ni.
Kumtharah hian hausakna um nana politics te kan hman loh nan mithar ni ila, he kumthar hian keimahni ah harhna min pe se, kan ram hi a tha, Pathian pek a ni. Mihring pawh an tha, Pathian pek bawk a ni. He thil pahnih ram leh mihring kan nei tawh a, kan ram tana hnam rohlu pahnih kan neihtawh hi chuan a enkawl thu thu he lei mihring danah chuan a ni tawh.
Pathian hi engkim a lo ni tih hi a chiang tawlh tawlh a. Chuvangin, keini hian kan hmalam, Mizoram hmalam kan thlirnaah hian Pathian lam i hawi ang u. Pathian duhdan hi kan hria, Bible leh Biak In leh hmun hrang hrangah min hrilh hre tu kan nei zel a. Pathian lam i hawi ang u.
“Kan party hian hun lo kal turah hian Pathian lam i hawi ila, a takin a thu i zawm ang u.β a ti a ni.
Congess Bhavan hawnna programe hi Pu Lal Thanzara, Sr. Vice President, MPCC chuan a kaihruai a, Maj. ST Dula’n Pathian thuchah a sawi bawk a ni. He hunah hian ram tana tawngtai rualna neih a ni bawk a ni.
