Vawiin khan Sub Headquarter YMA, Serchhip buatsaih Inter Branch YMA Football Tournament, 2022 kharna hun Serchhip Mini Complex field ah hman a ni a, bialtu MLA Lalduhoma’n khuallian niin hmanpui.
Lalduhoma chuan thusawiin,”Serchhip-in sport complex changtlung tak mai helai bialtu hmasa Pu Lal Thanhawla hmalakna a zara kan nei hi a chungah lawmthu kan sawi a, chei tur leh tih tur hmabak erawh a la awm a, hei hi hmalak zel kan tum a ni.” a ti a. ” Covid hnuah sport lamah hma kan sawn hle mai a, he district chhung atang ngei pawh hian sport a mi hlawtling tak tak kan nei a, a lawmawm hle a ni. YMA Sub Headquarter in sport lamah hma kan sawn theih nan leh thalaite ruihhlo laka an fihlim theih nana inzirtirna ni pah fawma hetiang an buatsaih hi a lawmawm hle a, a hlawhtlin ngei ka beisei a ni” a ti bawk.
Lalduhoma chuan,”Thla hmasa ah bial pum huapin Thenzawlah MLA cup kan lo buatsaih tawh bawk a, he tournament- in a tum ber chu ruihhlo do a ni a, ruihhlo avangin kan ram leh hnam a hmel hem em em a, ram pawh a tibuai nasa a ni . Heng ruihhlo hi bo sela chu ram changkang tak kan nih tawh ka ring a ni.” a ti a. “Ruihhlo hi nasa taka do a ngai a, chung zinga hmanraw pawimawh tak chu sport hi a ni. He tournament lo awm tur thlir lawk hian thalai tam tak an taksa ti thianghlim a, lo in la fit a lo in buatsaih kan awm a, hei ringawt pawh hian he tournament hi a hlawhtling hle tih a lantir a ni. Khawtlang mipuite pawhin tih tur kan nei a, hêng zu rui kan tih te hi kan ngaih theih loh a ngai a, vantlang puipun nikhua te hian heng ho hi ngai thei lo va, zurui awm lova thianghlim taka kan awm theihna tûrin kan zavai hian tan i la ang u.” a ti bawk.
He tournament ah hian Sub Headquarter YMA huamchhunga atangin YMA Branch 32 an tel a, final hi Serchhip Vengchung Branch YMA leh Chhingchhip Venghlun Branch YMA ten an khel a, Serchhip Vengchung Branch YMA ten chakna an chang a ni.
