Vawiin, ni 17 October, 2022 chawhma dar 10 – tlai dar 4 inkar hian India ram pumah State Pradesh Congress Committee aiawhte’n Indian National Congress President tur thlangin vote an thlak a. India ram state hrang hrangah INC President thlang thei hi mi 9,000 vel an awm a. Mizoramah chuan Thawhtanni (Monday) hi Party chhung inkhawm (Devotion) neih hun a nih vangin chawhnu dar 1 atangin Mizoram PCC aiawhtu mi 71 te’n vote an thlak a. Vote tla te hi a bika siam ballot Box in India ram state hrang hrang atanga phurh khawm a nih hnuah, October 19, 2022 khian INC Hqrs. New Delhi-ah vote te hi chhiar a ni ang.
Indian National Congress (INC) hmalam hun tur chungchanga Press mite zawhna chhangin MPCC President Lalsawta chuan, “Tunhma pawhin Gandhi chhungkaw pawn lam mi INC President kan lo nei fo tawh a, tunah pawh hian Gandhi family ni lo President kan nei dawn tih a chiang. Congress Party hi nasa takin a insiamtha mek a, hruaitu pawh kan inthlak chho zel ang. India rama BJP rorelna tha lo tak paihthla turin kan insang mar chho mek a ni,” a ti.
Lalsawta chuan, “Tunah hian BJP hi lian leh ropui angin lang mahse, politics-ah chuan zan khat thil thu lekah pawh inthlakthleng nasa tak a awm thei. Secularism hi Congress Party dinna leh India ram nihphung nghet tak a ni a, chu chu BJP-in nasa taka sawinghingin Hindu lalram din tumna lian tak a awm mek a. Hetiang avanga Kristian-te mangang tawngtaina hi Pathianin ala chhang ngei dawn a, kum khuain BJP te hi an sorkar dawn lo. BJP sorkar hnuaia MNF sorkar lo thlamuang ve em em ringawt pawh hi Mizo mipuite hian an la sawithiat dawn a, Secularism vawng nung rengtu Congress Party hi Mizoram mipuite hian an la dinchhuah tir leh ngei hi ka ring tlat a ni,” a ti.
Mizoram Congress chu Delhi-ah a innghat lo tih sawiin, “Tin, Mizorama Congress party chak leh chak loh hi Delhi a kan dinhmunin a hril lova, kan innghahna chu Lal Isua leh Mizoram mipuite an ni a. Election Manifesto pawh Mizoram mil tur Congress party in a siam a, chumi hmang chuan Zoram mipuite hnenah kan inpho chhuak thin. Mizoram tana tha tur nia an hriat chu Mizoram mipuite hian an thlang mai thin a. Central a sorkarna Congress party in a siam leh siam loh hi Mizoram a Congress party chak leh chak loh tur hriltu a ni lo” a ti bawk.
