Govt. Hrangbana College – Entrepreneurship Knowledge Cell (EKC) chuan ni 16-19 October 2024 chhungin Entrepreneurship Festival, E-Fest a buatsaih a, ni 16 October 2024 khan Young Indians, Mizoram Chapter te nen ṭang kawpin Entrepreneurs hlawhtling tak tak te nen EMPOWER and ELEVATE tih programme siam ani a, hetah hian college hrang hrang zirlai, entrepreneurship lama tui te kalkhawmin Young Indians member aṭangin resource person te – Rini Hlondo (Rini Hlondo Clothing Brand neitu), Henry Chhundeng (First Cry neitu), Zorammawia Tochhawng (Zote Honda leh Zote Toyota neitu), Sobin Jaishi (Safelines neitu) Robert Rohmingliana (Mark Advertising), Rokimi Khawlhring (Cookie Jar neitu), Hannah Khiangte (Fashion Industry) Christine Sailo (Mount Carmel School Vice Principal) ten an experience te leh tawn hriat te an hrilh mai bakah sumdawn tan ve duh tan tanpuina an pek thei reng thu an sawi a, zirlaiten hlawh thlak an ti hle a ni. He hun hi Prof.Lalbiakzuali, Head Department of Commerce leh EKC Chairman in a kaihruai a ni.
E-Fest hi ni 17 & 18 hian hman chhunzawm a ni a, EKC-Innovation Club te hmalakna in stalls chi hrang hrang te siam in, zirlai naupangten anmahni kutchhuak ngei te zuarin hun an hmang a. Zirlaite hian classroom zirlai mai bakah an eizawnna tura entrepreneurial skills an neih theih nan hmalakna chi hrang hrang Hrangbana College hian a nei reng a. Tun ṭuma an E-Fest pawh hi an hlut in hmun hrang hrang aṭangin dawrtu an tam hle a ni.