“Mizoram Budget Session kal mekah ni 3, March 2025 khan MYC bill sawiho a nih laia Mizoram Chief Minister leh House Leader, Pu Lalduhoma chuan MYC dinna leh a kalpui dan lo awm tawh chu hman chhunzawm tlak loh leh sawrkar kal tawhten anmahni inhaivurna tura din leh kalpui anga a sawi mai duh hi MNF chuan demawm kan ti takzet a. Heng bill te hi sawi ho leh pass anih lai pawha MLA ni ve reng, a hunlaia engmah sawilang lo, tuna a chhe ber anga a chhuah duh hi mi rilru hrisello a nihzia pholangtu ah kan ngai a ni,” tiin MNF chuan thuchhuah a siam.
Thuchhuahah chuan, “Sawrkar kal tawhte a chhe thei ang ber leh ram roreltu mipuiin an thlanchhuah tawhte zahphahna nei hauh lova anchhe tinreng nena a diriam duh mai kha kan ram hruaitu luber tih turah kan ngai lova, House zahawmna leh Hruaitu kal tate zahawmna hum tur berin a mawhphurhna hre hauh lova thianghlim ber leh tha ber anga a intarlang duh mai kha mi pangngai tih turah kan ngailo a ni.
“Dan siamthat, belh ngai belh leh paihthen ngai paih then hi thil kalphung a ni a, a hunlai mil ang zela mamawh leh tul anga dan te hi siam a, hman a ni thin. Siamthat mai ni lova, a hlui hnawl a, a thar Siam duhna riru kha tak alo lang ta a. House leader ber thusawi, house kalphung lo lutuk dodalna leh house zahawmna hum tura Opposition MLA ten huaisen taka bill an pass puilo ngam kha chhuanawm kan tiin, an huaisenna leh inpekna fakawm kan ti takzet a ni. House Leader ber hian hetiang thil zahpuiawm tak hi chingnawn tawhlo se kan duh takzet a ni.
“He Budget session kal mekah, sawrkar venpuina leh khalngil kawnga Opposition MLA te thawhrimna leh an hriatna hmanchhuah kawnga an chetdan te a ropui kan tiin, Ram tana thiltha thlen tur leh khua leh tuite hamthatna tura an auchhuahna te fakawm kan tiin, abik takin MNF MLA te huaisenna chu Ram rorelna kal mekah Rohlu takah kan ngai a. Venpui ngai sawrkar kan neih mek venpui kawnga theihtawp chhuah chhunzawm zel turin duhsakna kan hlan takmeuh a ni,” an ti bawk.
