Eight Mizoram Legislative Assembly thutkhawm vawi 10-na nithum chhung awh tur nimina neih tanah, General Administration Department changtu Minister Zoramthanga chuan zawhna leh chhanna hunah Serchhip Bialtu MLA Lalduhoma zawhna chhangin, Kum 2019 khan Minister-te hman tur Hyundai Verna 11 leh Scorpio 11, Rs. 316,36,539 man lei a nih thu a sawi a. Kum 2019 vek khan Chief Minister support car atan Rs. 25,56,000 man Jeep Compass lei a nih thu leh tun hnai mai khan Rs. 24,23,901 man Jeep Compass lei leh anih thu house a hrilh a, a man pek lawk anih thu bakah mawh bik leh tul bik thila lei anih thu a sawi.
Zawhbelhna chhangin General Administration Departmnet changtu Minister Zoramthanga lirthei an hman thin a tlan theih tawh loh avanga a thar lei ngai a nih thu house a hrilh a, pawisa pek lawk pawh department sum a awm ang ang lo hman lailawk a ni tiin a hnuah rulh leh a ni a ti bawk.
Thutkawm zawhna leh chhanna hunah Serchhip Bialtu MLA Lalduhoma zawhna chhangin School Education Department aiawha chhangtu Chief Minister Zoramthanga chuan Neihloh Government Middle School-ah Headmaster leh zirtirtu pathum an awm tih House a hrilh a, Neihloh Government Primary School-ah Headmaster leh zirtirtu pali an awm tih House a hrilh bawk.
Thutkhawm zawhna leh chhanna hun tawp berah Rural Development Minister Lalruatkima chuan West Tuipui Bialtu MLA Nihar Kanti Chakma zawhna chhangin, Tlabung RD Block a taka kalchho turin sorkarin hma a la mek tih house a hrilh a, tun dinhmunah a nih dan tur anga a kal hun tur sawi theih a nihloh thu a sawi bawk. Zawhbelhna chhangin Rural Development Minister Lalruatkima chuan Tlabung RD Block in a huamchin tur tihfel ani tawh a ti a, khaw 17 leh sub-village 10 a awm tur thu a sawi a, office hmunhma tur chu August thla khan Chief Minister hova en a nih thu a sawi bawk a ni.