Aizawl, 19th Sept., 2024: Nimin khan AMC Board of Corporators Meeting chu AMC BOC Meeting Hall, AMC Office, Thuampuiah neih a ni. Insak khuahkhirh dan, AMC building regulations huam chhunga factory leh commercial center te hamthatna dah lut tur siamthatna tur lungrual takin an pawm a; Aizawl khawpui chhunga Hotel, Hostel leh Restaurant ten faina leh thianghlimna kawngah AMC dan leh hrai an zawm tha em tih enfiah tura motion lut chu an pawm bawk.
BOC Meeting hi Aizawl Mayor Pu Lalrinenga Sailo in a kaihruai a. Mayor in a sawm angin Pi B. Lalawmpuii, Executive Corporator chuan AMC Building Regulations 2012 Amendment proposal a sawifiah a, member-ten sawihona nei chhunzawmin lungrual taka pawm a ni. He building regulation amendment hi standalone factory leh flatted factory te bakah commercial center chhunga building ten an ram neih ang te hmang tangkai lehzual tura building regulation siamthat rawtna a ni a. State sawrkarah pawmpui turin thehluh a ni leh ang.
Pu Rosiamngheta, Ward-V bialtu Corporator motion putluh, ‘Aizawl khawpui chhunga Restaurant, Hotel leh Hostel te hi AMC Licensing Regulations hnuaia awma establishment neiin register an nih angin an inenkawlna thianghlim leh that dan endik sak ni rawh se,’ tih chu sawihoin lungrual takin pawm a ni bawk a. Hmalak dan tur duang turin Sub Committee din nghal a ni a, Chairman atan Pu Rosiamngheta ruat a ni.
Meeting-ah hian Corporator te an kal tha hle a, tun hnaia Corporator thlan thar Dr. C. Malsawmtluangi, Ward-XIX bialtu leh Pu H. Lalremtluanga, Ward-VI bialtu te pawh meetingah hian an tel ve nghal a ni.