Vawiin khan India ram hmun dang rualin, Mizoramah pawh hmun hrang hrangah Teachers’ Day lawmna neih a ni.
I&PR Minister Lalruatkima chuan St. Anthony’s Higher Secondary School ten Teachers’ Day lawmna leh HSLC & HSSLC a hlawhtlingte chawimawina hun Aizawl Vanapa Hall-ah a hmanpui a. MBSE Chairman JH Zoremthanga chu khual zahawm a ni.
Lalruatkima chuan zirtirtute chu thalai te rilru leh ngaihtuahna buatsaihtute an ni a, kan ram future siamtute an ni, a ti. Kan piantirh atangin kan nu leh pa te hnen atangin zirtirna kan dawng tan a, chu chu kan chhungril ngaihtuahnaah intuhin kan nun a nghawng thui hle, a ti a. Kan zirtirtu ten zirlai bu leh nunphung zirlai pawimawh tak tak te min zirtir a, kan rilru put hmang leh khua leh tui tha ni turin kawng min kawhhmuh thin a ni, a ti. Zirlai bu min zirtir mai bakah zirtirtute chuan kan harsatna min hriatpui a, a sutkian theih dan kawng min zawnpui a, nun kawnga harsatna awm te hmachhawn dan thlengin min zirtir tiin Minister chuan zirtirtute pawimawhzia a sawi bawk.
Aizawl E-II Bialtu MLA leh Minister of State ni bawk Robert Romawia Royte chuan Chhinga Veng PS I-ah Teachers’ Day khuallian niin a hmanpui a ni.
Robert Romawia Royte chuan thu sawiin, zirtirtute chu hnam rohlu, khawtlang leh mi mal tin tihmasawntu an ni a. An puala ni bik siam hi an phu a, he ni-ah hian zahna chibai kan buk a ni a ti.
Sports Minister chuan a bial Aizawl E-II bial chhunga Sorkar sikul zawng zawngte chu a MLA Fund atangin Rs 20,000/- theuh Teachers’ Day puala a pek thu a sawi a. Teachers’ Day a hmanpuina Chhinga Veng PS-I chu sports items chi hrang hrang pein Teachers’ Day duhsakna a hlan bawk a ni.
He sikulah hian Zirlai naupang 112 awmin zirtirtu 6 an awm mek a, Teachers’ Day pual hian intihsiakna hrang hrang an nei a, lawmman semna neih nghal a ni bawk a ni.
Lalrinsanga Ralte, MLA chuan Dinthar Middle School – I ten Dinthar YMA Hall-a Zirtirtute Ni pual hun an hman chu hmanpuiin, “Zirtirtute hlutna hi sawi mai ni lova a taka tawngtu ka ni a. Zirtirtuten thahnemngai taka min lo zir tirna leh nun kawng min kawhhmuh thinna avangin vawiin hian lehkha ka lo zir tawh na ngei Dinthar Middle School-I a Khuallian ka lo ni ta hial mai a. Zirtirtute thawhrimna hian zirlaite nunah rah tha a chhuah chuan ram leh hnam tan hmasawnna ropui tak a thleng thin a. In school naupangte hi in hnathawh tarlanna file an ni,” tiin “Dinthar veng danglamna thlentu Zirtirtute hian fak leh chawimawi in phu a ni,” a ti a.
School in a mamawh leh tula an lo hman turin Lalrinsanga Ralte, MLA chuan tanpuina atan cheng singkhat a hlan a ni.
Nimin vek khan District Education Committee, Aizawl District bul tumin Teachers’ Day 2022’ lawmna, Directorate of School Education Conference Hall, Treasury Square-ah neih a ni a. Aizawl DC Dr. Lalhriatzuali Ralte, Chairman, District Education Committee ni bawk chuan he hun hi a hmanpui a ni.
Dr. Lalhriatzuali Ralte chuan zirtir hna chu hna pawimawh leh hna zahawm tak an ni tiin zirtirtute chu ram leh hnam tan an thawhhlawk nasat thu te, zirna pek bakah Sawrkar tan kawng hrang hranga an tangkai dante a sawi. Aizawl DC hian Aizawl District huamchhungah Teachers’ Day Award – Zirtirtu 2 hnenah (Life Time Achievement Award) leh School 2 hnenah School Award a hlan bawk a ni. Award dawng zirtirtute chu Lalnunkunga Sailo, Principal (Rtd) Mt. Carmel School leh P. Siamhranga. Mathematics zirtirtu ni thin te an ni a. School Award hi Govt. Mizo High School, Aizawl leh Dawrpui Middle School ten an dawng a ni.
Lalthanzama Addl. Director, School Education, pawhin thusawiin DEC Aizawl District in Zirtirtute Ni lawmna hun buatsaih a nih chu lawmawm a tih thu sawiin, zirtirtu te chu ram rohlu an nih thu te, naupangte hmakhua thui tak ruahman saktu an nih thu te a sawi a. Zirtirtu te chu khawi hmunah leh engtik lai pawha chawimawi phu an nih thu a sawi bawk a ni.
Aizawl District huam chhung ah hian Sawrkar (Government) School- 399 (P/S – 203, M/S-135, H/S- 52, HSS – 9); Samagra Shiksha School – 60 (P/S -14, M/S-30, H/S-13, HSS 3); Grant in Aid School – 62 (P/S – 0, M/S-23, H/S- 31, HSS -8) leh Private School – 359 (P/S – 35, M/S-135, H/S- 52, HSS – 9) te an awm mek a. A vaiin School 880 awm mekin, heng school-ah te hian zirlai 1,01,094 leh zirtirtu 6958 an awm mek bawk a ni.
Nimin zing khan Kolasib-ah ‘Teachers’ Day 2022’ puala zirtirtute chawimawina kawngzawh buatsaih a ni a. Venglai Bazar-ah John LT Sanga, Deputy Commissioner chuan zirlai kalkhawmte fuihna thu sawiin P.C.Lalngaizuala, District Education Officer chuan hun a kaihruai a ni.
Deputy Commissioner John LT Sanga chuan September ni 5 chu zirna ngai pawimawh tak leh zirna tihhmasawn nana thawhhlawk tak, India ram Vice President hmasa ber leh President pahnihna, Dr. S. Radhakrisnan piancham a hman thin a nih thu a sawi a. Zirturtute chu zirlaite theihna leh thiamna tipung tur a mi pawimawh tak an nih thu tarlangin mi hlawhtling leh hmantlak ni tur chuan zirtirtute zah thiam leh an thu awih chu thil pawimawh tak a nih thu a sawi.