Vawiin ni 24.06.2024 Thawhtanni hian MNF chuan Mizo Hnam Run-ah Chhung inkhawm a nei a, Prova Chakma, MLA chuan thusawiin, Hmeichhiate chu kawng tinrengah mipate el pha kan ni tawh a, politics khelh chungchangah ngat phei chuan duhthlanna leh inpekna chiah kan bak tawh a ni, a ti. Khawtlang nun leh politik chu hun hnih – Kristian hma leh Kristian hnuah a then theih a. Hun hmasaah chuan hmeichhiate dinhmun a chhe hle a, amaherawhchu tunah zet chuan hmeichhia te hi thiltithei tak, lehkha zirnaah pawh mi chung en, an hnathawhnaah pawh hlawtling tak tak te an nih tawh avangin hmeichhia nih vang ringawta insit leh kiltawih a hun tawh lo hle a ni, a ti bawk.
Lalpianfela Chawngthu, Legal Board Vice Chairman leh Gen. Secretary, MNF ni bawk pawhin Mizo Natioanlism chungchang sawiin, Kan ram leh hnam hi Pathianin min pek a ni a, enkawl leh humhim hi Pathianin min siam chhan leh duhdan a ni. Nationalism chuan kan ram leh hnam theuh enkawl leh venhimna lam a kawk a. Mizo ram leh hnam venhim leh enkawl, a dinchhuahna tura hmalak hi Mizo Nationalism a ni a. Tuma awpbeh loh leh mahnia ro inrel hnam (nation) nih hi nationalism in a tum a ni, a ti.
Pu Mapiana chuan, βPathianin Mizote MNF min pe a, kan duhdan reng leh kan thlan pawh ni loin Mizote leh Mizoram chu British sawrkar kutah kan tlu lut a. British sawrkarin min chhuahsan leh hnuah India hnuaiah kan duh vang ni lo bawkin tihpalh thilin ka tlu lut leh a. Vawiin thlengin India sawrkar hnuaiah kan la awm ta reng a ni. Tichuan, India sawrkar hnuaia kan awm chu vaihoin min chimraln tur kawng leh kan hnam leh sakhua tidal tur zawngin ke an pen thin a.1955 velah Mizo Cultural Society chu kan Hnam Pa Pu Laldenga, Secretary niin din a ni a. 1959 chhoah mautam tam nasa tak maiin kan ram a tuam a. India sawrkar chuan Mizote min ngaihsak tawk lo hle a. Riltam manganna ata Mizote min chhanchhuak turin Mizo National Famine Front din a lo ni a, hun a lokal zel a, Mizo National Famine Front chu Mizo National Front tiin October 22, 1961 ah din a lo ni ta a ni. Mizoteβn British-in min awp hmaa kan nihna, tuma awpbeh loh β ni leh thla kara leng kan nihna, mahnia ro inrel thin kan nihnaah let leh kan duh a. Tichuan, March ni 1, 1966 ah chuan Zaelnna (Independence) India sawrkar lakah kan lo puang ta a ni. Kum 20 chhung zet zalenna Mizoteβn kan sual a. Mizo mipuite ngenna avangin MNF te chuan June 30, 1986 ah kan ralthuamte dahin India nen Inremna kan lo nei ta a ni.
Mizoramah hian sawrkar nghet tha tak mai kan nei hi kan ram leh hnam himna atan thil pawimawh tak a ni. BJP a lo lian a, kum 2018 MLA inthlan dawnah te, kum 2023 MLA inthlan dawnah te mi tam takin BJP telloa sawrkarna siam theih loh; majority awm lo tur ang tein kan ring lawk a. Mahse, BJP telloin sawrkarna siam a ni leh thin a. A lawmawm em em a, kan thenawm Kristian State ve tho Nagaland leh Meghalaya-ah te chuan kan state anglo takin BJP an sawrkar siamnaah an tel ve thin a ni. Mizoramah BJP tello sawrkar hnuaiah Kan ram, kan hnam leh kan sakhua venhim kan la ni reng hi thil lawmawm tak a ni, a ti bawk.
Pu Mapiana chuan, MNF hi Mizo Nationalism a innghat kan ni a, Mizo nationalism tundin hi kan mawhphurhna a ni. MNF hian Mizoram tan kan nunna kan hlan ngam a, kan thisen far tawp thlengin he ram leh hnam tan hian kan tang ngam a ni tih khawvel hmaah kan lo lantir tawh a, kan la lantir chhunzawm zel dawn a ni, a ti bawk.