Dated Aizawl, The 13th.November.2024 ; Tukin khan Assembly subject committee II te chuan Bazar Aizawl City Center Annexe sak mek chu a hmunah an en a, Assembly subject committee member Pu Lalchhuanthanga MLA, Chairman, Pu W Chhuanawma MLA, Pu Lalmuanpuia Punte MLA, Er H Ginzalala MLA, Pu T Lalhlimpuia MLA, Pu RM Chakma MLA leh Pi Prova Chakma MLA te an tel a, Commerce & Industries Department official te an tel bawk.
He hunah hian Bazar pui, Commerce & Industries Site office ah inkawmhona neih a ni a, Pu Lalchhuanthanga chuan thusawiin, “Kan ram hmasawnna hnathawh reng reng hnathawh hun chhung bi tuka thawh zawh loh tam thin lutuk hian sorkar mai ni lo, a chhawrtu tur mipuite nunphung a tibuai a, chhungkaw khawsak a tibuai thin a ni. Contractor ten revised estimate an beisei leh thin a, sorkar sum pawhin a tuar phaha, ram hmasawnna kawng a muan phah hle a ni. Aizawl City Center Annexe building pawh hi sak zawh hun tura ruahmanna siam a pel thui ta hle mai, harsatna hrang hrang chu a awm ngei ang, chutih laiin mipuiten kan chhawr duh tawh a, kan mamawh tawh a ni, zan lamah te pawh hna thawk mai turin contractor te pawh ka ngen che u a ni. Building sak muan avangin chhungkaw tamtak eizawnna a nghawnga, sorkar lamah theih tawp kan lo chhuah ve ang a, mipuiten chhawr vat se tih hi kan duh tak zet a ni,” a ti bawk.
Pu W Chhuanawma MLA pawhin thusawiin, “Sumdawnna hi chhungkaw tam tak eizawnna a ni tawh a, chhan eng emaw avanga sumdawnna a khaihlak chuan ngaiawh leh a har duh hle a ni. Sorkar hmasate atangin Bazarpui sak that hi kalpui a ni tawh a, kum 5 bawr vel zet chu helai hmuna sumdawngte an khaihlak ta a ni. Bazarpui leh Aizawl City Center Annexe building pawimawhzia chu thingtlang kuthnathawktute thlengin min nghawng a, ni khat hna chawlh pawh a thiang tawh lo, hnathawktute pawh hi lak belh mai turin contractor te pawh ka ngen duh che u a, tun aia hna a chak leh zual a ngai tak zet a ni’, a ti bawk.
Aizawl City Center Annexe building hi Bazar pui building sak mek bula awm a ni a, nuai 3641.59 man a ni. NEDP project niin Lushai Engineers ten a sak hna hi thawkin Dt. 28. September.2018 khan contractor te hnenah sorkarin Letter of Acceptance a pe chhuak a, agreement ziah atanga thla 1 chhunga hna tan tur a nih laiin market-a eizawng ten kum 2018 leh 2019 Krismas vuakvetah awm an dil a, market-a eizawngte insawn lailawkna tur NEC sum senga sak peih fel a nih loh avang te leh Geo-technical investigation neih avang ten kum 2020.June.24 khan hna hi tan a ni. Bazar pui building thar, Aizawl City Center hi Aizawl Smart City hnuaia sak a ni a, City Center Annexe hi Commerce & Industry hnuaia sak niin, Lushai Engineers ten a sak hna hi an thawk ve ve a ni.
