Vawiin hian Prof. Lalnilawma Rural Development, PHE leh Horitculture Department changtu Minister chuan MLA a thlan tlin anih lawmthu sawi chibai semin a bial chhung khua Saitual, Keifang, Rulchawm, Ruallung, Lenchim, Mualpheng, Ṭawizo leh Maite khua te a tlawh a, lawmthu sawi chibai a sem kualnaah hian Prof. Lalnilawma chuan “ZPM Party kaihhruai Sawrkar-ah chuan hmasawnna hna (Development Work) reng reng quality ṭha taka thawh a nih theih nan Sawrkar in theihtawp a chhuah dawn a ni” a ti.
Minister chuan Party workers te pawh election laia mipui hnenah Kalphung thar, mipui Sawrkar intiamtu kan nih angin, hna kan thawk anih pawhin kan hnathawh reng reng ah dik tak leh ṭha takin kan thawk tur a ni a, hna quality chhe taka thawh a awm anih chuan ZPM party mi leh sa an ni emaw Sawrkar hnathawk an ni emaw a tu pawh ni se, Sawrkar in huaisen takin an chungah hma an lak zel dawn thu a sawi.
Prof. Lalnilawma chuan “Kum 2028 MLA Election-ah chuan mipuiin kan hnathawh en chungin Vote an thlak tawh dawn avangin, kan hnathawh hmangin tun atangin kan campaign nghal a ni tih hria ila, kan rilru leh ngaihtuahnaah pawh dik tak leh rintlak taka mipui tana hnathawk turin kan lo ruahman a ṭul a ni” a ti bawk.
