Baptist Church of Mizoram leh Champhai Grape Grower’s Society chuan Champhai Tlangsama grape tui sawr, sakramen atana hman zui zelna turin Thawhlehni khan Champhai Tlangsama grape tui sawrna hmunah hian inremna thuthlung (MoU) a vawi thumna atan an ziak.
Inremnaah hian BCM aiawhin general secretary Rev R. Lalbiakliana leh Champhai GGS aiawhin an chairman HS Vanlalfakzuala ten hming an ziah hnan a ni.
Report a tarlan danin, 2016 November 11 leh 2019 October 5 khan sacramental wine inleisak chungchangah BCM leh Champhaia grape chingute hian inremna thuthlung an lo ziak tawh a; zu khapna dan thar – the Mizoram Liquor (Prohibition) Act 2019 kalpui a nih khan he inremna hi kalpui zui zel theih a ni ta loa, tunhnaiah Mizoram sawrkar Council of Minister thutlukna thar angin grape wine hralh leh zawrh theih a nih dawn tak avangin, BCM leh Champhai Grape Grower’s Society hian tunhma lama inremna an lo neih tawh chu an tharthawh leh a ni.
Inremna thuthlung ziah a nih hma hian Rev. R Lalbiakliana chuan sakhaw serh leh sanga hman atan a tha nia an hriat avangin Champhaia grape tui sawrchhuah hi sacrament atan an hmang a, kohhran dang pawhin hmang ve thei se tih chu an duh dan a ni tih a sawi.
Horticulture department aiawha inremna hriatpuitu leh thusawitu Horticulture joint director C Lalremsiama chuan thinlung takin inremna thuthlung hi an lawmpuiin an hriatpui tih a sawi a ni.