Eight Mizoram Legislative Assembly thutkhawm vawi
10-na nithum chhung awh tur chu nimin khan Assembly House ah neih tan a ni a. Assembly Speaker Lalrinliana Sailo chuan Bible chang a chhiar hnuah zawhna leh chhanna hun hman a ni.
Zawhna leh chhanna hun hman zawh hnu hian Minister Lalchamliana chuan i) The Mizoram Private Security Agencies Rules, 2022 leh Notifications under the ii) Mizoram Goods and Services Tax,2017 chu House-ah a pharh a, Minister R. Lalzirliana’n i) 11th Annual report for the year 2018-2019 of the JERC for the State of Manipur and Mizoram ii) 12th Annual Report for the Year 2019-2020 of the JERC for the State of Manipur and Mizoram leh iii) 13th Annual 12th Annual Report for the Year 2020-2021 of the JERC for the State of Manipur and Mizoram chu House-ah a pharh bawk.
Thutkhawmah hian Assembly Speaker Lalrinliana Sailo chuan Tenth Report of the Business Advisory Committee for the Current Session a phochhuak a, Minister Pu Lalchamliana’n The Mizoram Goods and Services Tax (Amendment) Bill, 2022 chu House a sawiho a, pawmpui turin a pharh bawk a ni.
Thutkhawm Zawhna leh chhanna hunah Excise & Narcotics Department changtu Minister Dr. K Beichhua chuan Aizawl West-III Bialtu MLA VL. Zaithanzama zawhna chhangin, sorkarin Wine Rules siam a tum tih a sawi a, Grape Wine man sak tak te pek kir annih leh nihloh tur thu zawhbelhna pawh chhangin Wine Rules kalphung tur ruahman zawh anih hnuah danin a phut angin kalpui a ni ang a ti a, Grape Wine man sak tak te pawisa chawi cheng sang 3 chu pek kir a nih dawn loh thu a sawi bawk.
Lunglei South Bialtu MLA Dr.K Pachhunga zawhbelhna chhangin Excise & Narcotics Department changtu Minister Dr. K Beichhua chuan Grape Grower Society ten Wines Rules siam remtihna party dang pathum, Congress, BJP leh ZPM te hnenah an la tih a sawi a, Champhai North Bialtu MLA Dr. ZR Thiamsanga zawhbelhna chhangin Grape Wine bikah Excise duty chhiah lak a nih dawn thu leh Mizorama Grape thar chauh wine siamnan a hman phal anih tur thu a sawi bakah Dr. K Beichhua chuan Wine Rules chu Grape Wine Rules tiha thlak rem tih a nih thu a sawi bawk a ni.
Zawhna leh chhanna hunah vek hian Aizawl South I bialtu MLA C. Lalsawivunga zawhna chhangin, Power & Electricity Department changtu Minister R. Lalzirliana chuan Mizoram district khawpui zingah Saitual chuan Solar Town a puan a ni tawh tih House a hrilh a, district khawpui dang puan ve anih dawn leh dawnloh zawhbelhna chhangin sorkar laipui Ministry of New and Renewable Energy (MNRE) in state tin te chu thlang tura a tih anga Saitual chu Solar Town a puan a nih thu leh state sorkarin a duh duh a alo puan theih anih loh thu bakah a enkawl zuina pawh sorkar laipui atanga ruahmanna siam vek anih thu a sawi. Lengteng Bialtu MLA L. Thangmawia zawhbelhna chhangin Power & Electricity Department changtu Minister R. Lalzirliana chuan Vankal Solar Plant nikuma hawn tura tih chu hripui leng avangin nakum lama hawn theih beisei ani a ti a, Kawlhkulh Sub-Division pawh hawn thar a tul dawn tih House a hrilh bawk a ni.
Thutkhawm zawhna leh chhanna hunah vek hian School Education Department Minister Lalchhandama Ralte a awmloh avanga a aiawha chhangtu Chief Minister Zoramthanga chuan, Serchhip Bialtu MLA Lalduhoma zawhna chhangin Serchhip DIET ah Science leh Mathematics zirtirtu dah theih a beisei thu a sawi a, Aizawl North II Bialtu MLA Dr. Vanlalthlana zawhbelhna chhangin Primary School-a Headmaster-te hlawh hranpa siam turin hma lak an tum tih a sawi bawk a ni.