Chawngtlai Welfare Committee, Aizawl chuan, John VL. Hruaitluanga Chairman, CWC hoin, Dt. 29.09.2022(Ningani) zing dar 8:00AM-ah, LPS Profight khelh meka Final khel tur, Chawngtlai Boxer HC. Lalramfela leh C. Lalhruaitluanga te chu Bialtu MLA, Deputy Chief Minister ni bawk Pu Tawnluia hmelhriattirna hun an nei a. Deputy CM Pu Tawnluia hian lawm taka lo dawngsawngin, a bial chhunga LPS Profight Final lut thei Chawngtlai khuain pahnih lai an nei thei chu lawmawm a tih thu leh a chhuan takzet thu a sawi.
Chawngtlai Welfare te hian phut let nei lova Boxer te hmelhriattir tur ringawta Bialtu MLA hi hmu kan nih laiin, Bialtu MLA Pu Tawnluia hian, Fela leh Hruaia ten LPS Profight a final an thlen lawmpui nan Rs. 50,000/- ve ve a pek tur thu leh an Champion anih chuan Rs.1,00,000/- ve ve a pek tur thu a sawi a. Hemi bakah HC Lalramfela hi a Professional boxing fight hmasaber a a chak ṭum khan Pu Tawnluia Dy. CM hian Rs.1,00,000/- alo pe tawh bawk a ni. A chungah Chawngtlai Welfare Committee, Aizawl chu a lawm takzet a ni.
Bialtu MLA, a bial mipuite tana pa nih tling, bial mipuite hlawhtlinna ngaihlu thiam em em, Tuichang Bial hmangaihtu, MLA, Deputy Chief Minister Pu Tawnluia kan nei hi Chawngtlai Welfare Committee, Aizawl chuan vanneih thlak a tiin a chhuang takzet a, MLA chungah hian lawmthu a sawi mawlh mawlh a ni.
Tin, LPS Profight final khel tur Fela leh Hruaia te hian, Pu Tawna chunga an lawmthu hrilh pahin, a fapa neihchhun, November 23, 2017 a Chatuan ram pan ta, Pu Mazuala hriatreng nan he an fight hi hlan an tum thu an hrilh nghal a, an chhungkuain R. Dengṭhuama hall Mualpuiah an inkhel en turin Deputy CM te chhungkua hi an sawm nghal bawk a ni.
