EX MNA ten Assam Rifle insawnchhuak turin umzui zel

Aizawl June 2 : Ex- Mizo National Army President C.Zama chuan Lunglei Press Club-ah thuthar thehdarhtute kawmin Aizawl atanga Assam Rifle insawn duh loh chungchanga an lungawi loh thu a sawi.
Ex- MNA Association President C. Zama chuan Assam Rifle Zokhawsanga insawn tur chungchangah Chief Minister Pu Zoramthanga’n dawt a sawilo tiin, Central Sawrkarin a thupek a hlenchhuah loh vanga insawn lo an ni zawk a ti. Zokhawsanga Assam Rifle insawnna turah hian kawng tha tak siam a nih tawh bakah Power Supply pawh bun fel vel tawh niin, Water Supply pawh tih fel vek a ni tawh thu sawiin, an chenna tur building pawh peih vek tawh a ni a, heti chunga an insawn duhlo chu Ex- MNA Association chuan a ngai thu tak hle a, an insawn ngei theih nan hmalak zel an tum tih a sawi.
C.Zama chuan Ministry of Home Affairs chuan DG Assam Rifle Shillong hnenah Aizawla Assam Rifle awmte chu Zokhawsanga insawn tura hriattir in an insawn thu ni 31.5.2019 lehkha a report pe turin an lo tih tawh thu a sawi. Thuthar lakhawmtute kawmna ah hian Ex- MNA Association General Secretary VL. Rengliana chuan Assam Rifle insawn tur chungchangah hian India President in Mizoram a lo tlawh tumin an lo sawipui tawh thu leh kawng hrang hranga hma an lak thu sawiin, Assam Rifle te hian engmah chhuanlam tur an nei tawh lo a ni tiin an insawn duh lo chu an lungawi loh thu leh nawr zel an tum thu sawiin, MNF Returnee ten In leh Lo an dinna tur sum pawh Central lamin an pek that loh thu leh tlem tlem a an pek thin avanga In leh Lo din ngaihna a awm loh thu a sawi bawk a ni.