Nimin tlai lama Power & Electricity department, Lawngtlai a thawk, Francis Rochungnunga (30) Line Man (MR), power line a siamlai a electric current in a man vanga a boral chungchangah, helai bialtu SDO Lalnghakliani chu a hna aţanga chawlhtir a ni a, control room a duty pawh thubuai siamsak a ni.
Vawiin khan Lunglei Power Circle S.E H. Zonunsanga leh E.E pahnih chuan thilthlen dan chuichiangin Lawngtlai an ţhutchilh nghal a. He thilthlenga mawhphurtu ber a ngaih SDO Lalnghakliani chu a hna aţanga chawlh lailawktir a ni a, vanduaina thlen laia Control room a duty chu Lawngtlai Police te’n thubuai an siamsak tawh a, vanduaina thlenna bialtu J.E pawh chhuichian nghal a nih thu P&E hotute chuan an sawi.
H. Zonunsanga chuan Francis Rochungnunga’n a kalsan tak, a chhungte aţangin hnathawk thei tur an awm chuan an thawh awm tawk Sorkar chuan a ngaihtuah nghal tur thu a sawi a. October Ni 14 a Rulkual khawmi pathum in nunna an chan phahna pawh a hmunah enfiah ni tawhin, thuneitu sang zawkah report thehluh a nih tawh thu a sawi bawk a. Vanduaina tawkte chu zangnadawmna pek an nih tur thu P&E hotute chuan an sawi bawk.
Thu dawn danin Francis Rochungnunga hian Power line an siam dawn hian Control room lam bepawpin, current an tihthim hnu-ah a banah lawnin engemaw chen hna a thawk a. Hetih lai hian Current hian a man ta a ni. Vanduaina a thlen hnu hian District Hospital panpui niin, a nunna chhan theih a ni ta lo a. Tukin ah Post mortem examination tihfel a nih hnu-ah an khua Cheral panpui a ni.
