Aizawl 24th July 2023: Vawiin July 24, 2023 (Thawhtanni) hian Party Office-ah ZPM chuan chhung inkhawm hun an hmang a, he huna thusawitu Rev. Dr. K. Thanzauva, Vice President, ZPM General Headquarters chuan, “Kalphung tharah chuan eirukna kan nawr tawm dawn a, kan candidate-ten eirukna laka fihlim an intiam angin corruption tihbo kan tum dawn a ni,” a ti.
ZPM Vice President chuan, “Kalphung thar mipui sawrkar kan zuar a, corruption tih bo kan tum a ni. ZPM MLA Candidate tura kan thlan zawng zawng pawhin corruption lakah ka fihlim ang tiin an intiam a, he movement-ah hian eirukna nawr tawm a ni dawn a, sum tam tak eirukna avanga luang ral thin hi tihbo a ni tawh dawn a, vawiina sum kan indaih loh em em na thin pawh a bo theih a beiseiawm hle a ni. He kalphung tharah hian ram mipuite hmasawnna kawngah an bana kaih anni dawn a, kan hruaitute kal sual tur vengtu tur Val Upa Council kan nei lehzel te hian ngaih a ti ngam em em a ni. He revolution hi danglamna satliah a ni dawn lo va, anni pawh engmah an ni bik chuang lovang tia min sawina te hi hmanlai a chang tawh dawn a ni. Chief Minister Works Department chang lo ngam kan nei tawh dawn a, ani hruaina hnuaiah ram tha zawk, kan la kal ngai lohna ramah he ram hi siam a ni dawn a ni,’’ a ti.
Pu Zauva chuan, “Mizoram political history-ah revolution vawi hnih a thleng tawh a, a tum thumna tur hi a thleng dawn a ni. Lal ban movement a thleng a, Mizo Union revolution tiin a sawi theih awm e. MNF Movement a lo chhuak leh a, Independent kan theih leh thiam dan danin kan sual a, khaw hrang hrang sawikhawm a ni a, tawrhna namen lo kan hmachhawn a, kan in leh lo hal sak kan ni a, zirna hrang hrang pawh kal mumal thei lovin a awm a ni. 1972 UT pek kan ni a, political identity pek kan ni a, thil thar kan la tawn ngai loh kan tawn avangin kan hmang thiam lo hle niin a lang. Eirukna kan hmelhriat tan a, politics kan hmelhriat tan dan hi a fuh lo lai tam tak a awm. Vawiinah hian ZPM chuan third revolution – siam thatna revolution siam turin kan inbuatsaih mek a, kalphung thar mipui sawrkar siam turin hmalam kan pan mek a, Pathian hriatpui tlak sawrkar din hi kan tum ber a ni,” a ti bawk.
ZPM chhung inkhawm hun hi Pu Kapzawna, Adviser chuan a kaihhruai a, Upa Zoramkunga, Upper Republic chuan huserh hmangin bial hrang hrang – Mamit, Champhai South, Aizawl South III, Tawi, Thorang leh Lengteng-a hmalak mek dan report ngaihthlak niin GAD atangin report ngaihthlak a ni bawk a, kar hmasa July 17-22, 2023 inkarah ZPM zawm thar voter 1416 lawmluh a nih thu ngaihthlak a ni bawk.
