Manipur sorkar rorelna fel neih loh avanga Manipura chi leh chi inkara buaina in thla 19 lai mai nunphung a tih khaihlak a, pawisawi lo mi tam takin nunna an la chan zel hi Congress thalai chuan pawi a ti takzet a. Boruak a zia awm tawh dawna a lan laia misual firfiak ten Jiribam district Zairawn khuaa Zosangkimi Hmar (31) nasa taka an sawisak hnua, rawng taka an thah hnuah pawisawi lo tlawmngaia midang himna atana thawktu pasaltha sawmpakhat (11) laiin Jakhradwar, Jiribam-ah nunna an chan leh ta hi Congress thalai chuan pawi a tiin a dem takzet a ni.
MPYCC chuan, “Mipuite himna tura thawktu tur leh palai hna thawktu tur CPRF in Jiribam district-a mipui rikrap zawnga an che ta mai hi BJP sorkar chet rawva zia a tarlang hle a. Congress thalai chuan remna leh muanna ti thuanawp zawng leh buaina ti punlun zawnga mi firfiakte chetna a ranglama titawp nghal turin Manipur sorkar leh Central sorkar a ngen a. India ram hmai khawvel hmuha tibaltu, remna leh muanna hlu tak palzuttute chungah hremna pe turin Manipur sorkar leh Central sorkar Congress thalai chuan a phut bawk a ni.
“Congress thalai chuan midang tana nunna thapa an nunna hlu tak hlantu mi pasalαΉha ruang Lamka-a lak chhoh dan tur leh zela harsatna leh buaina a awm hi Congress thalai chuan hriathiam harsa a ti a. An phu ang ngeiin Mizoram kal tlanga anmahni lainattu mipuiin thlahna an hman theihna tura remruatna fel tak neitu Central Young Mizo Association chungah Congress thalai chuan lawmthu a sawi a ni. Congress thalai chuan heng midang tana nunna hlu tak hlantute hi thinlung takin thlahna hun hmannaah zahna a hlan dawn a ni,” an ti bawk.
