Congress sorkar lai khan buhfai subsidised nan hian thla khatah cheng vaibelchhe 10 dawnlai a sengral thin : Lalrindika Ralte, MLA

Vawiin January 25, 2023 hian Congress Bhavan, Aizawlah MPCC Wednesday Discussion Programme neih a ni a, Ration buhfai chungchang sawihona neih niin, Lalrindika Ralte, MLA & General Secretary, MPCC-in sawihawnna hun a hmang.

Lalrindika Ralte chuan, “Congress sorkar lai khan buhfai subsidised nan hian thla khatah cheng vaibelchhe 10 dawnlai a sengral thin a. Ngun taka ka zirna atangin hei hi tih tlem theih niin ka hria a. Sorkarin economic cost-in buhfai a lei thin a, a duh chuan open market atangin man tlawm zawkin a lei thei tih ka hria a. Sorkar hotute dawrin, theihtawpin hma ka la a, sorkarin economic cost-a FCI atanga a lei thin aia tlawmin dan ang thlapin open market atangin a lei thei ta a ni. Hei hi Politics a inpuhmawhna a awm thin a, keiman ka supply zui tak avangin sorkarin keimah min duhsak bik angin an sawi thin a, mahse a ni lo tih ka sawi duh a ni. Congress sorkar khan min duhsak bik vang a ni reng reng lo, man tlawm zawka ka pek theih vang chauh a ni,” a ti.

Lalrindika chuan, “Kan hriatna te, kan veina te, kan thiamnate hi ram leh hnam tan te, mahni mihring puite tana hlawk zawk leh tha zawka hmang tur kan ni a. Kan finna leh mi aia kan sanna te hi mahni hma sialna tur a ni lo. Pathian zarah Congress Party-in sorkarna kan chang a nih chuan hei aia tha zawk, hei aia sorkarin sum a sen tlem zawkna tur leh mipui hlimna tur zawk a mipui a buhfai pek dan tur kan hria,” a ti bawk.

Lalrindika chuan ration buhfai buk tling lo chungchang sawiin, “Ration buhfai chungchangah hian a buk tling lo hi a veiawm ka ti hle. Tunah hian Mizoram pumah ration card 2,82,483 a awm a, ngun taka kan lei zatte leh kan sensote ka chhutin ration card pakhatah kg. 1 in tling lo ta se, Mizoram puma a tlin lohna chu kg. 2,80,000 vel a ni tihna a ni. Tunah hian kg. 1 Rs. 45 in sorkarin a lei a, sum luangral zat hi a tam lutuk a ni. Ration card pakhatah kg. 4/5 ten buk a tling lo tih ka hria a, hetiang a chhut dawn phei chuan sum bothlau tak tak zat chu a tam hle ang. He thil hi a ven theih a, a tih bo theih tih chiang takin ka hria. Buhfai buk hi a tling tur a ni ringawt, mipuiten an chan tur an chang kim lo hi a dik lo a ni. Buhfai hi sorkarin a tlinga kan lei a nih chuan a tlingin mipuiah kan pe tur a ni. Mi Thlaa an inkah kai tawh laia buhfai a buk tling lo a lo la sem ringawt pawh hi a dik thei lo, kan theih loh hi a te lutuk. Thil dik lo hi kan haw tur a ni” a ti bawk.

He sawihona hunah hian C. Lalpianthanga, General Secretary, MPCC chu Moderator a ni a, mi engemawzatin ngaihdan an sawi a ni.