Congress Party-in May thla chhunga Tomir Fehchhuah a buatsaih chu tluang takin an nei zo ta a. Tomir Fehchhuahah hian undivided Aizawl District-a Congress party Block leh Unit hrang hrangte an tlawhchhuak a. MPCC hruaitute team 36 a insiamin team hrang hrangten anmahni chan theuhte hneh takin an tlawhchhuak a, Mizoram hmun hrang hrangah Congress party mite an phur phah hle niin an sawi.
Thuchhuah an siamah, “Tomir Fehchhuahah hian “Party insawhngheh leh Sorkar tura inbuatsaih” tih chu thupui atan hman a ni a. Thusawi tur point fel tak siam vekin, sorkar tha siam tura congress Party kan inbuatsaih nasat ziate, thalaite, loneitute leh kuthnathawktute eizawnna ngelnghet siamsak tura “Tang Puihna” siam a nih tur thu te, Healthcare tha tak siam a nih tur thu te, kalphung dik hmanga kal ngam sorkar huaisen siam kan tum thu te, Mizoramin sum leh paia harsatna a tawh mekte sukiang a, hmalam pana Mizoram a kal theih nana Congress Party kan sorkar leh ngei a ngaih thute aupui a ni.
“Tin, Congress Party-in That Loh Theih Lohna Bawm, SORKAR THA siam hi kan tum tak tak a, chutiang tur chuan hmun hrang hranga Congress Party mite kan danglam ngam a ngaih thute aupui a ni bawk.
Congress Party chuan kalphung thar hi sorkar hunah chauh kalpui tum lovin, tun atangin a takin a kalpui nghal a. MLA ni lai mek 5 te tih loh chuan bial vil bik neih phal a ni lo a, Congress Party hruaituten bial zawng zawng hneh takin kan vil ang a, a tling thei ngei tur mi tha, ram leh hnam hmangaih tak taktu Candidate tha tak a hun takah siam a ni dawn a ni. He kalphung thar hi Congress Party hruaituten an zawm tha hle a, Campaign Committee-in zin tura a tihna apiangah hruaitute phur takin an zinchhuak hlawm a ni. He kalphung thar hmang hian Mizoram tana hlauhawm em em, sum leh pai hmanga inlei tlin tumna awm thin pawh kan nuaibo theih ngei kan ring tlat a ni.
“Congress Party a insingsa mek a, Party chhungah danglamna nasa tak a thleng chho mek a ni. Congress Party hian Mizoram a la awm ngai lo Politics kalphung thar chhawpchhuah a, sorkar tha siam hi kan tum ber a ni a, Mizoram mipuite min thlawp turin kan sawm mawlh mawlh a ni,” tiin an tarlang a ni.
