Vawiin March 25, 2025 Thawhlehni hian Congress Bhavan-ah Mizoram Pradesh Congress chuan Mizoram Budget 2025-26 zirchianna hun Golden Hall, Congress Bhavan ah an hmang a, Dr James LT. Thanga, Associate Professor, Mizoram University chuan zirtirna hun a hmang a ni.
Dr James LT. Thanga chua, “Year of Consolidation kan tih, Inrenchem kum hi mipui ten sawkar kum 2015-2016 atang khan kan hmelhriat tan a. Kha khan a dawt leh sawrkar kumah khan nghawng tha tak a nei tih a lo lang a, sawrkar sum indaihlohna a lo tlahniam a, sum chuang bang Surplus an tih kha a awm hial a ni. Insiamthatna tak tak a awm chuan Revenue surplus hi a khawih a, chu chu hnathawhnaah a kal thei thin a ni. Sawrkar leiba tlingkhawm pawh nasa takin khatih lai khan a tlahniam a ni. Hei hi Congress Bhavan anih vanga sawi ka ni lova, a number ka sawi mai a ni.
“Tuna kan sawrkar hian sawrkar kum kal mekah hian Year of Consolidation an puang ve a, nakumah a nghawng a lo lang chho dawn a ni. Tuna a landan chuan sawrkar hnathawk hlawh leh inrelbawlna hi inrenchem kum berah hian vaibelchhe 1500 zetin a pung a ni. Sawrkar hnathawk hlawh leh pension hlawh te hi chu sawrkarin a thunun theih loh thil, pek ngei ngei ngai ani a, a bak lirthei leina, sawrkar chetvelna leh huau huau atana sum hman thunun theihah vaibelchhe sang chuangin a pung a, sawrkar hi a inrenchem lo hle niin a lang a, a pung nasa hle a ni. Kum kal mekah hian Sawrkar sum hmuh aia hman ral a punna hi a sang hle a, Revenue Deficit te kan nei bawk a, chuvangin Year of Consilidation hi a hlawhtling lovah a ngaih theih a ni.
“Sawrkar kal lai hi a vannei a, sum a hmu tha em em a, Central atang pawn an hmu tha a, an beisei aiin vaibelchhe 900 chuang an hmu a ni. Chutih lai chuan sum puk tura ruahman hi vaibelchhe 1992 anih laiin an ennawnaah chuan vaibelchhe 2065 lai an puk belh dawn a ni a, tun sawrkar kuma kan sum puk hi sawrkar kum khat chhunga kan sum puk tam ber tum a ni. Kan sum hmuh zawng zawng aia kan hman ral (Fiscal Deficit) pawh hi a tam ber kum a ni. Chuvangin Year of Consolidation hi Slogan pakhat ang lekah a ngaih theih a ni.
Sawrkarin hnathawhna tur a neih hi vaibelchhe 2235.80 a ni a, mipui rawngbawlna tur Agriculture leh RD department ah te nikum aiin sum dahhniama ni a. Social Services antih heng Health te, Education, PHE leh PWD ah te hian kum kal mek aiin vaibelchhe 874 zetin an dah tlem a, indaihlo tur Department an awm a ni. Mipui chan ve tur a tlem avang hian mipui budget a ni kei chuan ka ti ngam lo.” a ti.
He hun hi MPCC Treasurer Dr Lalmalsawma Nghaka chuan a kaihruai a ni.
