MPCC chuan thuchhuah siamin, “Mizoram Legislative Assembly Session neih mekah March 10, 2025 chawhma-a Zawhna leh Chhanna huna Pu Lalduhoma, Chief Minister, House Leader ni bawkin Pu C Ngunlianchunga, MLA zawhna Pu V. Zirsanga, CEM, Lai Autonomous District Council chungchang a chhannaah a zawttu MLA Anticipatory Bail la tura hrilhin vauna thu a chhak chhuak a. Hetianga mahni MLA puite vauna hi Assembly Session-ah tunhma a thil thleng ngailo, kan la hmuh ngai loh a ni a, a zahthlak hle. He thil hi MLA zahawm tak ten House chhunga zalenna an neih hmang ngam lo tura vau beh tumnaah kan ngai a, a pawi hle a ni. Hetiang thil hi Mizoram Legislative Assembly session-ah hian thleng ngai tawh lo se kan duh a, Pu Lalduhoma hian Pu C. Ngunlianchunga hnenah leh Assembly House chungah tunhnu a House zahawm nan thupha chawi turin kan phut bawk a ni,” an ti.
Thuchhuahah chuan, “Hmanni lawk, Chapchar Kut-ah khan kan CM hian ‘Hawihhawmna’ tih thupui hmangin thu a sawi a. Khata a thusawiah khan kan pi pute hawihhawm zia leh tunlai thangthar ten entawn se a duh thu a sawi a nih kha. A thusawi hnu lawkah tawngkam dengkhawng tak Assembly House-ah a hmang leh mai hi House Leader tawngkam tur niin a lang lo a, a demawm hle a ni. Thangthar te entawn tura a sawi kha amah ber hian a mamawh ber niin kan hria a ni.
Pu V. Zirsanga hi eiruk thubuaia court in thiam loh a chantir tawh, cheng nuai 4 chawia Kum 4 Jail tang tura hrem mek, bail a chhuah lailawk a ni. Kan CM leh a naute ZPM MLA ten hetia nataka a thlavang an hauh hi Corruption an huat tak tak loh zia lan na-ah kan ngai a, Inthlan hma a corruption chungchanga an intiamna te pawh kha mipuite hian an la hre reng a, an kal dan hi an lo thlir ve reng a ni. Pu V. Zirsanga chungchangah pawh hian kan CM in midang pir tel ran in a thlavang hauh mahse ZPM Val Upa Council ten Corruption case a Court in a convict tawh lakah hian engtin nge hma an lak dawn Zoram mipui in an thlir mek a ni.
“ZPM hian BJP kal dan an entawn em ni tih hi kan zawhna a ni. BJP te pawhin party dang mi corruption thubuai lian tak tak nei lai te an party ah an thlem lut a, an thubuai an ti tawp hmiah thin. ZPM pawh hian tlangkama an sawi ang hian Pu V. Zirsanga thubuai hi tihtawp sak an lo tiam em ni tih hi kan zawhna a ni,” an ti bawk.
