Chief Minister-in Central hruaitute a kawm

New delhi-a cham mek Chief Minister Zoramthanga chuan nimin khan President of India a hmu a, vawiin khan Minister for Road Transport & Highways, Home Minister leh Union Health Minister te kawmin Mizoram mamawhte a thlen bawk.
Chief Minister Zoramthanga hian President Droupadi Murmu hnenah hian Mizorama hmalakna pawimawh hrang hrang leh hmachhawpte, a tihhlawhtlinna tura sawrkar laipuia ministry hrang hrang hnenah mamawh a thlen te a sawipui a ni.
Chief Minister hian vawiin tlai khan Minister for Road Transport & Highways Nitin Gadkari hmu in Mizorama kawng siam leh tihchangtlun chungchang a sawipui a ni.
Nimin tlai vek khan New Delhi a cham mek Chief Minister Zoramthanga chuan Union Home Minister Amit Shah chu a chenna inah hmu in an inkawm.
Chief Minister chuan India ramin zalenna a sualchhuah kum 75 champhaphak lawmna ni pah fawmin Zokhawsanga Assam Rifles headquarters chu hawng turin Union Home Minister chu sawmin, ani pawhin rawn hawn ngei a tiam thu a sawi a; a hun tur tak erawh la sawithat leh ngai a nih thu a sawi a ni.
Amit Shah chuan Myanmar chungchang a ngaihven thu te sawiin, raltlan dinhmunte thui taka sawi a ni bawk.
Chief Minister chuan Union Minister of Health and Family Welfare Mansukh L. Mandaviya chu a pisa ah hmu in Health chungchanga Mizoram mamawh a thlen.
Chief Minister chuan Zoram Medical College (ZMC) chungchang sawipuiin, Mizoramin a enkawl dawn chuan a hautak dan te, mithiam ten zirchianna an neih hnu a hemi chungchanga ruahmanna tha nia an hriat an siam, sawrkar laipui pawh a an lo thehluh tawh thu te a hrilh a. India hmarchhak medical college tam tak ministry in a laksak a, a chawm ang hian laksak ve ni se tiin a dil a. Seat chungchang leh thildang hrang hrang ngaihtuah tel ngai te pawh sawi a ni a. Health Ministry leh Mizoram Health Department ten an pawmtlan theih ve ve tur la sawikhawm ni se tiin, Union Minister chuan Mizoram dinhmun a hriatthiampui thu leh theihtawp a lo chhuahpui tur thu a sawi a.
Mizoram Cancer hospital atana cheng vaibelchhe 10 bawr vel man khawl leina tur Central Ministry atanga puihna dil a nih thu thlen bawkin, Union Minister chuan tihhlawhtlin a nih theih nan theihtawp a lo chhuahpui tur thu Chief Minister hi a hrilh bawk.
Chief Minister hi H. Rammawi, Planning Board Vice Chairman leh Amjad Tak, Mizoram House Resident Commissioner ten an tawiawm a ni.